Read Papantla Totonac Eksodo 30 Bible Online

Eksodo 30 - Papantla Totonac bible

Eksodo 30

¹"Ademas, bo mester traha un altar komo un luga pa kima sensia; bo mester trah'e di palu di akasia.

²Su largura mester ta un kodo i su hanchura un kodo; e mester ta firkant, i su haltura mester ta dos kodo; su kachunan mester forma un solo pida kune.

³Anto bo mester fur'e ku oro puru, su parti ariba i su bandanan tur ront i su kachunan; i traha un leishi di oro tur ront di dje.

⁴I bo mester traha dos renchi di oro p'e bou di su leishi; traha nan na su dos bandanan--na e bandanan ku ta keda enfrente di otro--i nan mester ta kosnan pa tene e baranan pa kargu'e kune.

⁵Tambe bo mester traha e baranan di palu di akasia i fura nan ku oro.

⁶I bo mester pone e altar aki dilanti di e velo ku ta keda dilanti di e arka di testimonio, dilanti di e propisiatorio ku ta riba e arka di testimonio, kaminda Mi lo reuni ku boso.

⁷"I Aaron mester kima sensia aromatiko riba dje; e mester kima esaki tur mainta ora ku e ta korta mecha di e lampinan.

⁸I ora ku Aaron ta korta mecha di e lampinan ora nochi ta sera, e mester kima sensia. Mester tin sensia perpetuo dilanti di SENOR durante di tur boso generashonnan.

⁹Boso no mag ofrese sensia strano riba e altar aki, ni ofrenda kima, ni ofrenda di mainshi; i boso no mag basha ofrenda di bibida riba dje.

¹⁰I Aaron mester hasi ekspiashon riba e kachunan di e altar un biaha pa ana; e mester hasi ekspiashon riba dje ku e sanger di e ofrenda pa pika di ekspiashon un biaha pa ana durante di tur boso generashonnan. E ta masha santu mes pa SENOR."

¹¹Tambe SENOR a papia ku Moises, bisando:

¹²"Ora bo ta tuma un senso di e yunan di Israel pa konta nan, e ora ei kada un di nan mester duna plaka di reskate pa su alma na SENOR, ora bo ta konta nan, pa no tin plaga entre nan ora bo ta konta nan.

¹³Esaki ta loke kada un ku wordu konta mester duna: mitar siklo, segun e siklo di e santuario (un siklo ta binti gera), mitar siklo komo un ofrenda na SENOR.

¹⁴Tur hende ku wordu konta, di binti ana p'ariba, mester duna e ofrenda na SENOR.

¹⁵E riku no mester paga mas, ni e pober no mester paga menos ku e mitar siklo, ora boso duna e ofrenda na SENOR pa hasi ekspiashon pa boso alma.

¹⁶I boso mester tuma e plaka di ekspiashon for di e yunan di Israel, i duna esaki pa e sirbishi di e tent di reunion, pa e por ta un konmemorashon pa e yunan di Israel dilanti di SENOR, pa hasi ekspiashon pa boso alma."

¹⁷I SENOR a papia ku Moises, bisando:

¹⁸"Tambe bo mester traha un labamano di brons, ku su pia di brons, pa laba; i pon'e entre e tent di reunion i e altar, i pone awa aden.

¹⁹I Aaron ku su yu hombernan mester laba nan man i nan pia for di dje;

²⁰ora nan ta drenta e tent di reunion nan mester laba nan mes ku awa pa nan no muri; of ora nan ta aserka e altar pa sirbi dor di kima un ofrenda di kandela na SENOR.

²¹Asina nan mester laba nan man i nan pia pa nan no muri; i esaki mester ta un statuto perpetuo pa nan, pa Aaron ku su desendientenan durante di tur nan generashonnan."

²²Ademas, SENOR a papia ku Moises, bisando:

²³"Kohe tambe pa bo mes e miho spesereinan: sinku shen siklo di mirra likido i mitar di e kantidat ei, esta, dos shent'i sinkuenta siklo di kane aromatiko, i dos shent'i sinkuenta siklo di kana aromatiko,

²⁴i sinku shen siklo di kasia, segun e siklo di e santuario, i un hin di zeta di oleifi.

²⁵I ku esakinan bo mester traha un zeta di unshon santu, un meskla di perfume, e obra di un trahado-di-perfume; e lo ta un zeta santu di unshon.

²⁶I ku esaki bo mester ungi e tent di reunion i e arka di testimonio,

²⁷i e mesa ku tur su artikulonan-di-uzo, e kandela ku su artikulonan-di-uzo i e altar di sensia,

²⁸i e altar di ofrenda kima ku tur su artikulonan-di-uzo i e labamano ku su pia.

²⁹Tambe bo mester konsagra nan, pa nan por ta masha santu mes; kiko ku bin den kontakto ku nan lo ta santu.

³⁰"I bo mester ungi Aaron ku su yu hombernan i konsagra nan, pa nan sirbiMi komo saserdote.

³¹Anto bo mester papia ku e yunan di Israel, bisando: 'Esaki mester ta un zeta santu di unshon pa Mi durante di tur boso generashonnan.

³²E no mag wordu basha riba kurpa di ningun hende, ni boso no mag traha nada meskos kune, di e mesun formula; e ta santu i e lo ta santu pa boso.

³³Ken ku meskla algu paresido, of ken ku pone algu di dje riba un stranhero, mester wordu korta kita for di su pueblo.'"

³⁴E ora ei SENOR a bisa Moises: "Kohe pa bo mes spesereinan, balsem, onicha i galbanum, spesereinan ku sensia puru; di tur, e mesun kantidat.

³⁵I di esaki bo mester traha sensia, un perfume, e obra di un trahado-di-perfume, sala, puru i santu.

³⁶I bati poko di dje hasi fini-fini, i pone parti di dje dilanti di e testimonio den e tent di reunion, kaminda Ami lo reuni ku boso; e lo ta masha santu mes pa boso.

³⁷I e sensia ku bo traha, boso no mester traha di e mesun formula pa boso mes; e lo ta santu pa bo pa SENOR.

³⁸Ken ku traha algu paresido, pa uza komo perfume, mester wordu korta kita for di su pueblo."