Read Papantla Totonac Eksodo 32 Bible Online

Eksodo 32 - Papantla Totonac bible

Eksodo 32

¹Awor ora ku e pueblo a mira ku Moises a tarda pa baha for di e seru, e pueblo a reuni ront di Aaron i a bis'e: "Ban mira, traha pa nos un dios ku lo bai nos dilanti, pasobra e Moises aki, e homber ku a saka nos for di tera di Egipto, nos no sa kiko a para di dje."

²I Aaron a bisa nan: "Kita e renchinan di oro ku tin na orea di boso esposanan, boso yu hombernan i boso yu muhenan, i trese nan pa mi."

³E ora ei henter e pueblo a kita e renchinan di oro ku nan tabatin na nan orea i a hiba nan pa Aaron.

⁴I el a tuma e oro for di nan man, a duna esaki forma ku un herment pa graba i a traha un bishe basha kune. Anto nan a bisa: "Esaki ta bo dios, O Israel, ku a sakabo for di tera di Egipto."

⁵Awor ora Aaron a mira esaki, el a traha un altar dilanti di e bishe; i Aaron a hasi un proklamashon i a bisa: "Manan lo tin un fiesta na SENOR."

⁶I su manise nan a lanta tempran i a ofrese ofrendanan kima i a trese ofrendanan di pas; i e pueblo a sinta pa kome i bebe i a lanta pa gosa.

⁷E ora ei SENOR a bisa Moises: "Baha bai mesora, pasobra bo pueblo ku bo a saka for di tera di Egipto a korumpi su mes.

⁸Masha lihe nan a bandona e kaminda ku Mi a ordena nan. Nan a traha pa nan mes un bishe basha, a adora esaki, a ofrese sakrifisio na dje i a bisa: 'Esaki ta bo dios, O Israel, ku a sakabo for di tera di Egipto!'"

⁹I SENOR a bisa Moises: "Mi a mira e pueblo aki, i ata, nan ta un pueblo kabesura.

¹⁰Pesei awor, lagaMi ketu, pa Mi rabia kima kontra nan i pa Mi destrui nan; i di bo lo Mi traha un nashon grandi."

¹¹E ora ei Moises a suplika SENOR su Dios, i a bisa: "O SENOR, pakiko Bo rabia ta kima kontra Bo pueblo ku Bo a saka for di tera di Egipto ku gran poder i ku un man poderoso?

¹²Pakiko e egipsionan mester bisa: 'Ku mal intenshon El a saka nan pa mata nan den e serunan i pa destrui nan for di riba superfisio di tera'? Bira for di Bo rabia ardiente i kambia Bo idea di hasi dano na Bo pueblo.

¹³Korda riba Abraham, Isaak i Israel, Bo sirbidonan, na kendenan Bo a hura pa Bo mes i kendenan Bo a bisa: 'Lo Mi multiplika boso desendientenan manera e streanan di e shelunan, i henter e tera aki, di kual Mi a papia, lo Mi duna bo desendientenan, i nan lo ered'e pa semper.'"

¹⁴Asina SENOR a kambia Su idea enkuanto e dano ku El a bisa ku E lo a hasi na Su pueblo.

¹⁵E ora ei Moises a bira baha for di e seru ku e dos tablanan di testimonio den su man, tablanan ku tabata skirbi na tur dos banda; nan tabata skirbi na esun banda i na e otro banda.

¹⁶I e tablanan tabata Dios Su obra, i e skirbimentu tabata Dios Su skirbimentu, graba riba e tablanan.

¹⁷Awor ora Josue a tende e zonidu di e pueblo ku tabata grita, el a bisa Moises: "Tin un zonidu di guera den e kampamentu."

¹⁸Ma Moises a bisa: "No ta zonidu di gritu di viktoria, ni zonidu di gritu di derota; ma ta zonidu di kantamentu mi ta tende."

¹⁹I a sosode ku asina Moises a yega serka di e kampamentu, el a mira e bishe i e baliamentu; i Moises su rabia a kima, i el a tira e tablanan for di su man i a kibra nan na pida-pida na pia di e seru.

²⁰I el a kohe e bishe ku nan a traha, a kim'e ku kandela i a mul'e hasie fini-fini, i a stroi e riba superfisio di e awa. I el a hasi e yunan di Israel bebe esaki.

²¹E ora ei Moises a bisa Aaron: "Kiko e pueblo aki a hasibo ku bo a trese un pika asina grandi riba nan?"

²²I Aaron a bisa: "No laga e rabia di mi senor kima; bo mes konose e pueblo, ku nan ta lihe pa hasi maldat.

²³Pasobra nan a bisami: 'Traha un dios pa nos ku lo bai nos dilanti, pasobra e Moises aki, e homber ku a saka nos for di tera di Egipto, nos no sa kiko a para di dje.'

²⁴I mi a bisa nan: 'Ken ku tin oro, laga nan kit'e.' Asina nan a dunamie, i mi a tir'e den kandela, i ata e bishe aki a sali for di dje."

²⁵Awor ora Moises a mira ku e pueblo tabata for di kontrol--pasobra Aaron a laga nan sali for di kontrol pa ta un berguensa entre nan enemigunan--

²⁶Moises a bai para den entrada di e kampamentu i a bisa: "Ken ku ta pa SENOR, bin serka mi!" I tur e yu hombernan di Levi a reuni serka dje.

²⁷I el a bisa nan: "Asina SENOR, e Dios di Israel, ta bisa: 'Kada homber pone su spada na su kustia, i kana bai bin di entrada pa entrada den e kampamentu, i kada homber mata su ruman homber i kada homber su amigu i kada homber su prohimo.'"

²⁸Asina e yu hombernan di Levi a hasi konforme e palabra di Moises, i mas o menos tres mil homber di e pueblo a muri e dia ei.

²⁹E ora ei Moises a bisa: "Konsagra boso mes awe na SENOR--pasobra kada homber tabata kontra su yu homber i kontra su ruman homber--pa E por basha un bendishon riba boso awe."

³⁰I a sosode ku su manise Moises a bisa e pueblo: "Boso a komete un pika grandi, i awor mi ta bai serka SENOR; podise mi por hasi ekspiashon pa boso pika."

³¹E ora ei Moises a bolbe serka SENOR i a bisa: "Ai, e pueblo aki a komete un pika grandi, i nan a traha un dios di oro pa nan mes.

³²Ma awor, si ta Bo boluntat, pordona nan pika--i si no, pa fabor, kitami for di Bo buki ku Bo a skirbi!"

³³I SENOR a bisa Moises: "Esun ku a peka kontra Mi, esei lo Mi kita for di Mi buki.

³⁴Ma bai awor, hiba e pueblo kaminda Mi a bisabo. Mira, Mi Angel lo bai bo dilanti; sinembargo, den e dia ku Mi kastiga, lo Mi kastiga nan pa nan pika."

³⁵Asina SENOR a kastiga e pueblo pa motibu di loke nan a hasi ku e bishe ku Aaron a traha.