Read Papantla Totonac Eksodo 33 Bible Online

Eksodo 33 - Papantla Totonac bible

Eksodo 33

¹E ora ei SENOR a papia ku Moises: "Bai for di akinan, abo i e pueblo ku bo a saka for di tera di Egipto, subi bai na e tera ku Mi a hura na Abraham, Isaak i Jakob, bisando: 'Na bo desendientenan lo Mi duna esaki.'

²I lo Mi manda Mi Angel bo dilanti, i lo Mi kore ku e kananeo, e amoreo, e heteo, e ferezeo, e heveo i e jebuseo.

³Bai na un tera ku tin lechi i miel na abundansia. Ma Ami lo no bai meimei di bo, pa motibu ku bo ta un pueblo kabesura, pa Mi no destruibo na kaminda."

⁴Ora ku e pueblo a tende e palabra tristu aki, nan a tene rou, i ni un di nan no a bisti su prendanan.

⁵Pasobra SENOR a bisa Moises: "Bisa e yunan di Israel: 'Boso ta un pueblo kabesura; si Mi a bai meimei di bo pa un momento so, lo Mi a destruibo. Pesei anto, kita bo prendanan for di bo kurpa, pa Mi sa kiko Mi ta bai hasi ku bo.'"

⁶Asina e yunan di Israel a kita nan prendanan banda di Seru Horeb.

⁷Awor Moises a kohe e tent i a lant'e pafo di e kampamentu, un bon distansia for di e kampamentu, i el a yama esaki e tent di reunion. I a sosode ku tur hende ku tabata buska SENOR, tabata sali bai na e tent di reunion ku tabata keda pafo di e kampamentu.

⁸I a sosode ku ki ora ku Moises tabata sali bai na e tent, henter e pueblo tabata lanta para, kada un na entrada di su tent, i tabata keda tene Moises na bista te ora ku e drenta e tent.

⁹I a sosode ku ki ora ku Moises tabata drenta e tent, e pilar di nubia tabata baha i keda para na entrada di e tent; i SENOR tabata papia ku Moises.

¹⁰Ki ora ku henter e pueblo tabata mira e pilar di nubia para na entrada di e tent, henter e pueblo tabata lanta i adora, kada un na entrada di su tent.

¹¹Asina SENOR tabata papia kara-kara ku Moises, meskos ku un hende ta papia ku su amigu. E ora ei Moises tabata bolbe na e kampamentu, ma su sirbido Josue, yu homber di Nun, un homber hoben, si no tabata kier a kita for di e tent.

¹²E ora ei Moises a bisa SENOR: "Mira, Bo ta bisami: 'Bai ku e pueblo aki!' Ma Abo mes no a lagami sa ken Bo ta manda huntu ku mi. Ademas, Bo a bisa: 'Mi a konosebo pa nomber, i tambe bo a hana grasia den Mi bista.'

¹³Pesei anto, mi ta rogaBo, si mi a hana grasia den Bo bista, lagami konose Bo kamindanan, pa mi konoseBo, pa mi hana grasia den Bo bista. Konsidera tambe ku e nashon aki ta Bo pueblo."

¹⁴I El a bisa: "Mi presensia lo bai ku bo i lo Mi dunabo sosiegu."

¹⁵Anto Moises a bis'E: "Si Bo presensia no ta bai ku nos, no hiba nos for di akinan.

¹⁶Pasobra kon por ta konosi anto ku mi a hana grasia den Bo bista, ami i Bo pueblo, si no ta pasobra Abo ta bai ku nos? Asina nos, ami i Bo pueblo, lo keda distingui for di tur otro pueblo ku ta riba e superfisio di tera."

¹⁷I SENOR a bisa Moises: "Tambe e kos aki di kual bo a papia, lo Mi hasi, pasobra bo a hana grasia den Mi bista i Mi a konosebo pa nomber."

¹⁸E ora ei Moises a bisa: "Mi ta rogaBo, mustrami Bo gloria!"

¹⁹I El a bisa: "Ami mes lo laga tur Mi bondat pasa bo dilanti, i lo proklama e nomber di SENOR bo dilanti; i lo Mi mustra grasia na esun ku Mi kier mustra grasia, i mustra kompashon na esun ku Mi kier mustra kompashon."

²⁰Tambe El a bisa: "Bo no por mira Mi kara, pasobra ningun hende no por miraMi i keda na bida!"

²¹Anto SENOR a bisa: "Mira, tin un luga serka Mi, i bo mester para ayanan riba e baranka;

²²i lo sosode ku ora Mi gloria ta pasa, lo Mi ponebo den sker di e baranka i tapabo ku Mi man te ora Mi a kaba di pasa.

²³E ora ei lo Mi kita Mi man i lo bo mira Mi lomba, ma Mi kara lo no wordu mira."