Read Papantla Totonac Eksodo 34 Bible Online

Eksodo 34 - Papantla Totonac bible

Eksodo 34

¹Awor SENOR a bisa Moises: "Kap pa bo mes dos tabla-di-piedra manera esunnan di prome, i lo Mi skirbi riba e tablanan e palabranan ku tabatin riba e prome tablanan ku bo a kibra na pida-pida.

²Pesei, perkura di ta kla pa manan mainta i subi Seru Sinai mainta, i presenta bo mes na Mi ayanan riba kabes di e seru.

³I ningun hende no mester subi huntu ku bo, ni ningun hende no mag wordu mira ningun kaminda riba e seru; ni e tounan di bestia chikitu ni e krianan di baka no mag kome yerba dilanti di e seru ei."

⁴Asina el a kap dos tabla-di-piedra manera esunnan di prome, i Moises a lanta mainta tempran i a subi Seru Sinai, manera SENOR a orden'e, i el a kohe dos tabla-di-piedra den su man.

⁵I SENOR a baha den e nubia i a keda para einan huntu kune, i a proklama e nomber di SENOR.

⁶E ora ei SENOR a pasa su dilanti i a proklama: "SENOR, SENOR Dios, yen di kompashon i grasia, Kende no ta rabia lihe i Kende ta abunda den miserikordia i berdat;

⁷Kende ta mantene miserikordia pa milnan, Kende ta pordona inikidat, transgreshon i pika; sinembargo, di ningun manera E lo no laga di kastiga e kulpabel, ma ta bishita e inikidat di tatanan riba e yunan i riba e nietunan te na e di tres i e di kuater generashon."

⁸I mesora Moises a buig te na suela i a adora.

⁹I el a bisa: "Si awor mi a hana grasia den Bo bista, O Senor, mi ta rogaBo, laga Senor bai huntu ku nos, apesar ku e pueblo ta asina kabesura; i Abo pordona nos inikidat i nos pika, i tuma nos komo Bo mes erensia."

¹⁰E ora ei Dios a bisa: "Mira, Mi ta bai sera un aliansa. Dilanti di henter bo pueblo lo Mi hasi milagernan ku no a wordu hasi den henter tera, ni entre ningun di e nashonnan; i henter e pueblo, meimei di kual bo ta biba, lo mira e obra di SENOR, pasobra ta un kos tremendo Mi ta bai hasi ku bo.

¹¹Sea sigur di warda loke Mi ta ordenabo awe; mira, Mi ta bai kore ku e amoreo for di bo dilanti, i e kananeo, e heteo, e ferezeo, e heveo i e jebuseo.

¹²Perkura pa bo no sera ningun aliansa ku e habitantenan di e tera kaminda bo ta bai, pa esaki no bira un trampa meimei di boso.

¹³Ma mas bien, basha nan altarnan abou i kibra nan pilarnan sagrado na pida-pida i kap nan imagennan di Asera.

¹⁴No adora ningun otro dios, pasobra SENOR, Kende Su nomber ta Yalurs, ta un Dios yalurs.

¹⁵"Perkura pa bo no sera un aliansa ku e habitantenan di e tera i nan prostitui nan mes dor di sigui tras di nan diosnan i ofrese sakrifisio na nan diosnan, i un hende invitabo pa kome di su sakrifisio,

¹⁶i abo tuma algun di su yu muhenan pa bo yu hombernan, i su yu muhenan prostitui nan mes dor di sigui tras di nan diosnan i hasi bo yu hombernan tambe prostitui nan mes dor di sigui tras di nan diosnan.

¹⁷"No traha diosnan basha pa bo mes.

¹⁸"Warda e Fiesta di Pan Sin Zurdeg. Pa shete dia bo mester kome pan sin zurdeg, manera Mi a ordenabo, na e tempu stipula den luna di Abib, pasobra ta den luna di Abib bo a sali for di Egipto.

¹⁹"E prome yu ku nase di tur matris ta pertenese na Mi, i tur bo bestianan machu, e prome yu ku nase di baka i karne.

²⁰I ku un lamchi bo mester redimi e prome yu ku nase di un buriku; i si bo no redimi esaki, e ora ei bo mester kibra su nek. I redimi tur primogenito di bo yu hombernan. "I ningun hende no mag presenta Mi dilanti man bashi.

²¹"Seis dia bo mag traha, ma e di shete dia bo mester sosega; tambe durante di tempu di plug i di kosecha bo mester sosega.

²²"I selebra e Fiesta di Simannan, esta, e prome frutanan di kosecha di trigo, i e Fiesta di Rekohementu na fin di ana.

²³Tres biaha pa ana tur bo yu hombernan mester presenta dilanti di SENOR Dios, e Dios di Israel.

²⁴Pasobra lo Mi kore ku nashonnan for di bo dilanti i ekstende bo fronteranan, i ningun hende lo no kudisha bo tera ora bo bai tres biaha pa ana pa presenta dilanti di SENOR bo Dios.

²⁵"No ofrese e sanger di Mi sakrifisio ku pan ku tin zurdeg aden, ni e sakrifisio di e Fiesta di Pasku no mag keda te su manise.

²⁶"Hiba e miho di e prome frutanan di bo tera den e kas di SENOR bo Dios. "No herebe un lamchi den e lechi di su mama."

²⁷E ora ei SENOR a bisa Moises: "Skirbi e palabranan aki, pasobra konforme e palabranan aki Mi a sera un aliansa ku bo i ku Israel."

²⁸Asina e tabata ayanan serka SENOR kuarenta dia i kuarenta nochi; e no a kome pan ni bebe awa. I El a skirbi riba e tablanan e palabranan di e aliansa, e Dies Mandamentunan.

²⁹I a sosode ku ora Moises tabata baha for di Seru Sinai (i e dos tablanan di testimonio tabata den Moises su man ora ku e tabata baha for di seru), Moises no tabata sa ku e kutis di su kara tabata briya pa motibu ku el a papia ku SENOR.

³⁰I ora ku Aaron i tur e yunan di Israel a mira Moises, e kutis di su kara tabata briya, i nan tabatin miedu di yega serka dje.

³¹E ora ei Moises a yama nan, i Aaron ku tur e gobernantenan di e kongregashon a bolbe serka dje, i Moises a papia ku nan.

³²I despues tur e yunan di Israel a hala serka, i el a ordena nan pa hasi tur loke SENOR a bis'e riba Seru Sinai.

³³Ora Moises a kaba di papia ku nan, el a pone un velo dilanti di su kara.

³⁴Ma ki ora ku Moises tabata bai dilanti di SENOR pa papia kuné, e tabata kita e velo te ora ku e tabata sali. I ki ora ku e tabata sali i tabata papia ku e yunan di Israel loke ku el a wordu ordena,

³⁵e yunan di Israel tabata mira kara di Moises, ku e kutis di Moises su kara tabata briya. Asina Moises tabata bolbe pone e velo dilanti di su kara te ora ku e tabata bai paden pa papia ku SENOR.