Read Papantla Totonac Eksodo 35 Bible Online

Eksodo 35 - Papantla Totonac bible

Eksodo 35

¹E ora ei Moises a reuni henter e kongregashon di e yunan di Israel i a bisa nan: "Esakinan ta e kosnan ku SENOR a ordena boso pa hasi.

²Seis dia trabou mag wordu hasi, ma e di shete dia mester ta un dia santu pa boso, un sabat di sosiegu kompleto na SENOR; ken ku hasi trabou riba e dia ei mester wordu mata.

³Boso no mag sende kandela den ningun di boso luganan di biba riba dia di sabat."

⁴I Moises a papia ku henter e kongregashon di e yunan di Israel, bisando: "Esaki ta loke SENOR a ordena, bisando:

⁵'Tuma for di meimei di boso un ofrenda pa SENOR; esun ku su kurason ta dispuesto, lagu'e hiba esaki komo ofrenda pa SENOR: oro, plata i brons;

⁶hilu blou, purpura i skarlata, lino fini, lana di kabritu;

⁷kueru di karne chubatu tina kora, i kueru di dolfein i palu di akasia,

⁸i zeta pa e lus i speserei pa e zeta di unshon i pa e sensia aromatiko,

⁹i piedranan di oneks i piedranan pa montura, pa e efod i pa e pechero.

¹⁰'I laga tur homber eksperto entre boso bin i traha tur loke SENOR a ordena:

¹¹e tabernakel, su tent ku su kapa, su haknan ku su tablanan, su baranan, su pilarnan i su pianan;

¹²e arka ku su baranan, e propisiatorio i e velo di e skerm;

¹³e mesa, su baranan i tur su artikulonan-di-uzo i e pan di e Presensia;

¹⁴tambe e kandela pa e lus ku su artikulonan-di-uzo i su lampinan ku e zeta pa e lus;

¹⁵i e altar di sensia ku su baranan i e zeta di unshon i e sensia aromatiko i e skerm pa e entrada na e entrada di e tabernakel;

¹⁶e altar di ofrenda kima ku su roster di brons, su baranan i tur su artikulonan-di-uzo, e labamano ku su pia;

¹⁷e kortinanan di e plenchi, su pilarnan ku su pianan i e skerm pa e entrada di e plenchi;

¹⁸e stakanan di e tabernakel, e stakanan di e plenchi ku nan kordonnan;

¹⁹e pananan gewef pa sirbi den e luga santu, e pananan santu pa saserdote Aaron, i e pananan di su yu hombernan pa sirbi komo saserdote.'"

²⁰E ora ei henter e kongregashon di e yunan di Israel a sali for di presensia di Moises.

²¹I tur hende ku su kurason tabata konmov'e i tur hende ku su spiritu tabata hasie dispuesto, a bin i a trese e ofrenda di SENOR pa e trabou di e tent di reunion i pa tur su sirbishi i pa e pananan santu.

²²Anto tur ku nan kurason tabata hasi nan dispuesto, tantu homber komo muhe, a bin i a trese borspel, renchi di orea, renchi-di-seyo i armbant, tur sorto di artikulo di oro; asina tur hende ku tabata presenta un ofrenda di oro na SENOR tabata hasi.

²³I tur hende ku tabatin hilu blou, purpura i skarlata, lino fini, lana di kabritu, kueru di karne chubatu tina kora, i kueru di dolfein, tabata trese nan.

²⁴Tur hende ku tabata por a duna un ofrenda di plata i brons tabata trese e ofrenda di SENOR; i tur hende ku tabatin palu di akasia pa kualke trabou di e sirbishi tabata trese esaki.

²⁵I tur e muhenan eksperto tabata hila ku nan man, i tabata trese loke nan a hila, hilu blou, purpura i skarlata i lino fini.

²⁶I tur e muhenan ku nan kurason tabata konmove nan ku kapasidat tabata hila lana di kabritu.

²⁷I e gobernantenan tabata trese e piedranan di oneks i e piedranan pa montura pa e efod i pa e pechero;

²⁸i e speserei, i e zeta pa e lus i pa e zeta di unshon i pa e sensia aromatiko.

²⁹E yunan di Israel, esta, tur e hombernan i tur e muhenan ku nan kurason tabata konmove nan pa trese material pa tur e trabou ku SENOR, dor di Moises, a ordena pa wordu hasi, tabata hiba un ofrenda boluntario pa SENOR.

³⁰E ora ei Moises a bisa e yunan di Israel: "Mira, SENOR a yama Bezaleel, yu homber di Uri, yu homber di Hur, di e tribu di Juda, pa nomber.

³¹I El a yen'e ku e Spiritu di Dios den sabiduria, den komprendementu, den konosementu i den tur obra:

³²pa traha disenonan pa obra di oro, di plata i di brons,

³³i pa korta piedra pa montura, pa graba den palu, i asina traha tur sorto di obra fini.

³⁴Tambe El a pone den su kurason i den kurason di Aholiab, yu homber di Ahisamak, di e tribu di Dan, pa sina otro hende.

³⁵El a yena nan ku kapasidat pa traha tur trabou di grabado, di disenado, di bordado ku hilu blou, purpura i skarlata i lino fini, i di wefdo-di-tela: trahadonan di tur trabou i trahadonan di diseno.