Read Papantla Totonac Eksodo 36 Bible Online

Eksodo 36 - Papantla Totonac bible

Eksodo 36

¹"Awor Bezaleel i Aholiab i tur persona eksperto, den kendenan SENOR a pone kapasidat i komprendementu pa sa kon pa hasi tur e trabou den konstrukshon di e santuario, mester hasi konforme tur loke SENOR a ordena."

²E ora ei Moises a yama Bezaleel i Aholiab i tur persona eksperto, den kendenan SENOR a pone kapasidat, kada un ku su kurason tabata konmov'e pa bin hasi e trabou.

³I di Moises nan a risibi tur e kontribushonnan ku e yunan di Israel a hiba pa hasi e trabou den konstrukshon di e santuario. I ainda e pueblo tabata sigui hiba ofrendanan boluntario p'e tur mainta.

⁴I tur e hombernan eksperto ku tabata hasi tur trabou di e santuario a bin, kada un for di e trabou ku e tabata hasi,

⁵i nan a bisa Moises: "E pueblo ta hiba muchu mas ku sufisiente pa e trabou di konstrukshon ku SENOR a ordena nos pa hasi."

⁶Pesei Moises a duna ordu, i un proklamashon a wordu pasa ront den henter e kampamentu, bisando: "No laga ni homber ni muhe hasi ningun trabou mas pa e ofrendanan di e santuario." Asina nan a stop e pueblo di hiba mas.

⁷Pasobra e material ku nan tabatin tabata sufisiente, i mas ku sufisiente, pa tur e trabou ku mester a wordu hast.

⁸I tur e hombernan eksperto entre esnan ku tabata hasi e trabou a traha e tabernakel di dies kortina; di lino fini trosi i hilu blou, purpura i skarlata, ku kerubin, e obra di un trahado eksperto, Bezaleel a traha nan.

⁹E largura di kada kortina tabata bint'i ocho kodo, i e hanchura di kada kortina, kuater kodo; tur e kortinanan tabatin e mesun midi.

¹⁰I el a pega sinku kortina na otro, i e otro sinku kortinanan el a pega na otro.

¹¹I el a traha lus kolo blou na rant di e kortina ku tabata mas pafo den e prome set; i meskos el a hasi na rant di e kortina ku tabata mas pafo den e di dos set.

¹²El a traha sinkuenta lus den esun kortina i el a traha sinkuenta lus na rant di e kortina ku tabata den e di dos set; e lusnan tabata keda un enfrente di otro.

¹³I el a traha sinkuenta hak di oro i a pega e kortinanan na otro ku e haknan, asina ku e tabernakel a keda tur na un.

¹⁴E ora ei el a traha kortina di lana di kabritu hasi nan un tent pa tapa e tabernakel; el a traha diesun kortina na tur.

¹⁵E largura di kada kortina tabata trinta kodo, i kuater kodo e hanchura di kada kortina; e diesun kortinanan tabatin e mesun midi.

¹⁶I el a pega sinku kortina na otro i e otro seis kortinanan na otro.

¹⁷Ademas, el a traha sinkuenta lus na rant di e kortina ku tabata mas pafo den e prome set, i el a traha sinkuenta lus na rant di e kortina ku tabata mas pafo den e di dos set.

¹⁸I el a traha sinkuenta hak di brons pa pega e tent na otro, pa e keda tur na un.

¹⁹I el a traha un kapa pa e tent di kueru di karne chubatu tina kora, i un kapa di kueru di dolfein riba dje.

²⁰E ora ei el a traha e tablanan pa e tabernakel di palu di akasia, para regt.

²¹E largura di kada tabla tabata dies kodo i e hanchura di kada tabla, un kodo i mei.

²²Tabatin dos penchi pa kada tabla, pa pega nan na otro; asina el a hasi ku tur e tablanan di e tabernakel.

²³I el a traha e tablanan pa e tabernakel: binti tabla pa e banda suit;

²⁴i el a traha kuarenta pia di plata bou di e binti tablanan; dos pia bou di esun tabla pa su dos penchinan i dos pia bou di e otro tabla pa su dos penchinan.

²⁵Anto pa e di dos banda di e tabernakel, na e banda nort, el a traha binti tabla,

²⁶i nan kuarenta pianan di plata; dos pia bou di esun tabla i dos pia bou di e otro tabla.

²⁷I pa e parti patras di e tabernakel, na e parti pabou, el a traha seis tabla.

²⁸I el a traha dos tabla pa e skinanan di e tabernakel na e parti patras.

²⁹I abou nan tabata pega na otro, i ariba pega huntu ku un solo renchi. Asina el a traha nan dos pa e dos skinanan.

³⁰I tabatin ocho tabla ku nan pianan di plata, dieseis pia, dos bou di kada tabla.

³¹Anto el a traha baranan di palu di akasia, sinku pa e tablanan di esun banda di e tabernakel,

³²i sinku bara pa e tablanan di e otro banda di e tabernakel, i sinku bara pa e tablanan di parti patras di e tabernakel, parti pabou.

³³I el a traha e bara meimei pa pasa dor di e tablanan, net meimei, di punta pa punta.

³⁴I el a fura e tablanan ku oro i a traha nan renchinan di oro pa tene e baranan kune, i a fura e baranan ku oro.

³⁵Ademas, el a traha e velo di hilu blou, purpura i skarlata, i lino fini trosi; el a trah'e ku kerubin, e obra di un trahado eksperto.

³⁶I el a traha kuater pilar di palu di akasia p'e, i a fura nan ku oro, ku nan haknan di oro; i el a basha kuater pia di plata pa nan.

³⁷I el a traha un skerm pa entrada di e tent, di hilu blou, purpura i skarlata, i lino fini trosi, obra di un wefdo-di-tela;

³⁸i el a traha su sinku pilarnan ku nan haknan, i el a fura nan kapitelnan i nan banchinan ku oro, ma nan sinku pianan tabata di brons.