Read Papantla Totonac Eksodo 37 Bible Online

Eksodo 37 - Papantla Totonac bible

Eksodo 37

¹Awor Bezaleel a traha e arka di palu di akasia; su largura tabata dos kodo i mei, i su hanchura un kodo i mei, i su haltura un kodo i mei;

²i el a fur'e ku oro puru paden i pafo, i a traha un leishi di oro p'e tur ront.

³I el a basha kuater renchi di oro p'e na su kuater pianan; dos renchi na esun banda di dje i dos renchi na e otro banda di dje.

⁴I el a traha baranan di palu di akasia i a fura nan ku oro.

⁵I el a pasa e baranan den e renchinan na e bandanan di e arka, pa karga e arka kune.

⁶I el a traha un propisiatorio di oro puru, dos kodo i mei largu, i un kodo i mei hanchu.

⁷I el a traha dos kerubin di oro; di obra bati-ku-martiu el a traha nan, na e dos puntanan di e propisiatorio;

⁸un kerubin na esun punta i un kerubin na e otro punta; el a traha e kerubinnan di un solo pida ku e propisiatorio na e dos puntanan.

⁹I e kerubinnan tabatin nan halanan habri manda ariba, i tabata tapa e propisiatorio ku nan halanan, ku nan kara den direkshon di otro; kara di e kerubinnan tabata den direkshon di e propisiatorio.

¹⁰Despues el a traha e mesa di palu di akasia, dos kodo largu i un kodo hanchu, i un kodo i mei haltu.

¹¹I el a fur'e ku oro puru i a traha un leishi di oro tur ront di dje.

¹²I el a traha un rant p'e di hanchura di un man tur ront, i a traha un leishi di oro pa su rant tur ront.

¹³I el a basha kuater renchi di oro p'e i a pone e renchinan na e kuater skinanan ku tabatin na su kuater pianan.

¹⁴Pega ku e rant tabatin e renchinan, e kosnan pa tene e baranan pa karga e mesa kune.

¹⁵I e baranan pa karga e mesa kune el a traha di palu di akasia i a fura nan ku oro.

¹⁶I el a traha e artikulonan-di-uzo ku tabatin riba e mesa: su tayonan, su kucharanan, su komchinan i su kanikanan pa basha e ofrendanan di bibida kune, di oro puru.

¹⁷Anto el a traha e kandela di oro puru. El a traha e kandela, su base i su pia di obra bati-ku-martiu. Su kelkinan, su konopinan di flor i su flornan tabata di un solo pida kune.

¹⁸I tabatin seis brasa ta sali for di su bandanan; tres brasa di e kandela for di esun banda di dje, i tres brasa di e kandela for di e otro banda di dje;

¹⁹tres kelki traha den forma di flor di amandel, un konopi di flor i un flor den un brasa, i tres kelki traha den forma di flor di amandel, un konopi di flor i un flor den e otro brasa--i asina pa e seis brasanan ku ta sali for di e kandela.

²⁰I na e kandela tabatin kuater kelki traha den forma di flor di amandel, su konopinan di flor i su flornan;

²¹i tabatin un konopi di flor bou di e prome par di brasa ku ta sali for di dje, i un konopi di flor bou di e di dos par di brasa ku ta sali for di dje, i un konopi di flor bou di e di tres par di brasa ku ta sali for di dje, pa e seis brasanan ku ta sali for di e kandela.

²²Nan konopinan di flor i nan brasanan tabata di un solo pida kune; tur huntu e tabata un solo obra di oro puru bati-ku-martiu.

²³I el a traha su shete lampinan ku su kosnan-pa-paga-lampi i su skalchinan, di oro puru.

²⁴I el a traha e kandela ku tur su artikulonan-di-uzo di un talento di oro puru.

²⁵Anto el a traha e altar di sensia di palu di akasia: un kodo largu i un kodo hanchu, firkant, i dos kodo haltu; su kachunan tabata di un solo pida kune.

²⁶I el a fur'e ku oro puru, su parti ariba i su bandanan tur ront i su kachunan; i el a traha un leishi di oro tur ront di dje.

²⁷I el a traha dos renchi di oro p'e bou di su leishi, na su dos bandanan--enfrente di otro--komo kosnan pa tene e baranan pa kargu'e kune.

²⁸I el a traha e baranan di palu di akasia i a fura nan ku oro.

²⁹Tambe el a traha e zeta santu di unshon i e sensia puru di spesereinan aromatiko, obra di un trahado-di-perfume.