Read Papantla Totonac Eksodo 38 Bible Online

Eksodo 38 - Papantla Totonac bible

Eksodo 38

¹Anto el a traha e altar di ofrenda kima di palu di akasia, sinku kodo largu i sinku kodo hanchu, firkant, i tres kodo haltu.

²I el a traha su kachunan na su kuater skinanan; su kachunan tabata di un solo pida kune, i el a fur'e ku brons.

³I el a traha tur e artikulonan-di-uzo di e altar: e hemchinan, e skopnan, e puncheronan, e forkinan i e weanan-pa-kandela; el a traha tur su artikulonan-di-uzo di brons.

⁴I el a traha pa e altar, bou di su rant, un roster di brons ku tabata yega na mitar di e haltura di e altar.

⁵I el a basha kuater renchi na e kuater puntanan di e roster di netwerk di brons komo kosnan pa tene e baranan kune.

⁶I el a traha e baranan di palu di akasia i a fura nan ku brons.

⁷I el a pasa e baranan den e renchinan na e bandanan di e altar, pa kargu'e kune. El a traha e altar hol, di tabla.

⁸Tambe el a traha e labamano di brons, ku su pia di brons, for di e spilnan di e muhenan sirbido ku tabata sirbi na entrada di e tent di reunion.

⁹E ora ei el a traha e plenchi: pa e banda suit e kortinanan di e plenchi tabata di lino fini trosi, shen kodo;

¹⁰nan binti pilarnan i nan binti pianan, traha di brons; e haknan di e pilarnan i nan banchinan tabata di plata.

¹¹I pa e banda nort, shen kodo; nan binti pilarnan i nan binti pianan tabata di brons. E haknan di e pilarnan i nan banchinan tabata di plata.

¹²I pa e banda pabou tabatin kortina di sinkuenta kodo ku nan dies pilarnan i nan dies pianan. E haknan di e pilarnan i nan banchinan tabata di plata.

¹³I pa e banda pariba, sinkuenta kodo.

¹⁴E kortinanan pa esun banda di e entrada tabata diesinku kodo largu, ku nan tres pilarnan i nan tres pianan,

¹⁵i meskos pa e otro banda. Na tur dos banda di e entrada di e plenchi tabatin kortina di diesinku kodo, ku nan tres pilarnan i nan tres pianan.

¹⁶Tur e kortinanan tur ront di e plenchi tabata di lino fini trosi.

¹⁷I e pianan pa e pilarnan tabata di brons; e haknan di e pilarnan i nan banchinan, di plata; i e furamentu di nan kapitelnan, di plata, i tur e pilarnan di e plenchi tabatin banchi di plata.

¹⁸I e skerm pa entrada di e plenchi tabata di hilu blou, purpura i skarlata, i lino fini trosi, obra di e wefdo-di-tela. I e largura tabata binti kodo i e haltura tabata sinku kodo, i tabata koresponde ku e kortinanan di e plenchi.

¹⁹I nan kuater pilarnan i nan kuater pianan tabata di brons; nan haknan tabata di plata, i e furamentu di nan kapitelnan i nan banchinan tabata di plata.

²⁰I tur e stakanan di e tabernakel i di e plenchi tur ront tabata di brons.

²¹Esaki ta e inventario di e tabernakel, e tabernakel di e testimonio, kual a wordu konta konforme e ordu di Moises, pa e sirbishi di e levitanan, bou di direkshon di Itamar, yu homber di saserdote Aaron.

²²Awor Bezaleel, yu homber di Uri, yu homber di Hur, di e tribu di Juda, a traha tur loke SENOR a ordena Moises.

²³I Aholiab, yu homber di Ahisamak, di e tribu di Dan, un grabado, un trahado eksperto i un wefdo-di-tela di hilu blou, purpura i skarlata, i di lino fini, tabata huntu ku Bezaleel.

²⁴Tur e oro ku a wordu uza pa e trabou, den tur e trabou di e santuario, tambe e oro di e ofrenda di zoyamentu, tabata 29 talento i 730 siklo, segun e siklo di e santuario.

²⁵I e plata di esnan di e kongregashon, ku a wordu konta, tabata 100 talento i 1.775 siklo, segun e siklo di e santuario;

²⁶un beka pa kada homber (esta, mitar siklo segun e siklo di e santuario), pa kada un ku a pasa ofer pa esnan ku a wordu konta, for di binti ana p'ariba, pa 603.550 homber.

²⁷I e 100 talentonan di plata tabata pa basha e pianan di e santuario i e pianan di e velo kune; 100 pia pa e 100 talentonan, un talento pa kada pia.

²⁸I di e 1.775 siklonan el a traha hak pa e pilarnan i a fura nan kapitelnan i a traha banchi pa nan.

²⁹I e brons di e ofrenda di zoyamentu tabata 70 talento i 2.400 siklo.

³⁰I di esei el a traha e pianan pa entrada di e tent di reunion, e altar di brons ku su roster di brons i tur e artikulonan-di-uzo di e altar,

³¹i e pianan tur ront di e plenchi ku e pianan di entrada di e plenchi, i tur e stakanan di e tabernakel i tur e stakanan di e plenchi tur ront.