Read Papantla Totonac Eksodo 39 Bible Online

Eksodo 39 - Papantla Totonac bible

Eksodo 39

¹Ademas, di e hilu blou, purpura i skarlata nan a traha pana fini gewef pa sirbi den e luga santu, i a traha e pananan santu pa Aaron, meskos ku SENOR a ordena Moises.

²I el a traha e efod di oro, i di hilu blou, purpura i skarlata, i lino fini trosi.

³E ora ei ku martiu nan a bati plachinan di oro i a korta nan na drachi-drachi, pa wef nan huntu ku e hilu blou, purpura i skarlata, i e lino fini, e obra di un trahado eksperto.

⁴Nan a traha strep-di-skouder pa e efod; e tabata pega na su dos puntanan ariba.

⁵I e banchi masha fini gewef ku tabata na dje tabata di e mesun kalidat di obra, di e mesun material: di oro, di hilu blou, purpura i skarlata, i lino fini trosi, meskos ku SENOR a ordena Moises.

⁶I nan a traha e piedranan di oneks, pega den montura di oro filigrana; nan tabata graba manera ta graba un seyo, segun e nombernan di e yunan di Israel.

⁷I el a pone nan riba e strepnan-di-skouder di e efod, komo piedra di konmemorashon pa e yunan di Israel, meskos ku SENOR a ordena Moises.

⁸I el a traha e pechero, e obra di un trahado eksperto, manera e obra di e efod: di oro, di hilu blou, purpura i skarlata, i lino fini trosi.

⁹E tabata firkant; nan a traha e pechero dobel, un span largu i un span hanchu, ora ku e ta dobla na dos.

¹⁰I nan a pega kuater kareda di piedra na dje. E prome kareda tabata un kareda di rubi, topasio i esmeralda;

¹¹i e di dos kareda: un turkesa, un safiro i un djamanta;

¹²i e di tres kareda: un yasinto, un agata i un amatista;

¹³i e di kuater kareda: un berilo, un oneks i un yaspe. Nan a wordu pega den montura di oro filigrana.

¹⁴I e piedranan tabata konforme e nombernan di e yunan di Israel; nan tabata diesdos, konforme nan nombernan, graba manera ta graba seyo, kada un ku su nomber pa e diesdos tribunan.

¹⁵I riba e pechero nan a traha kadenanan manera kordon di obra di kordon trosi, di oro puru.

¹⁶I nan a traha dos montura di oro filigrana i dos renchi di oro i a pone e dos renchinan na e dos puntanan di e pechero.

¹⁷E ora ei nan a pasa e dos kordonnan di oro den e dos renchinan na e puntanan di e pechero.

¹⁸I nan a pega e dos otro puntanan di e dos kordonnan na e dos monturanan di filigrana i a pone nan riba e strepnan-di-skouder di e efod, na su parti dilanti.

¹⁹I nan a traha dos renchi di oro i a pone nan na e dos puntanan di e pechero, na su rant parti paden di e efod.

²⁰Tambe nan a traha dos renchi di oro i a pone nan na e parti abou di e dos strepnan-di-skouder di e efod, na su parti dilanti, serka di e luga kaminda e ta pega na otro, riba e banchi gewef di e efod.

²¹I ku un kordon blou nan a mara e pechero ku su renchinan na e renchinan di e efod, pa e keda na e banchi gewef di e efod, i pa e pechero no los for di e efod, meskos ku SENOR a ordena Moises.

²²I el a traha e mantel di e efod di obra gewef, tur blou;

²³i e habri di e mantel tabata na e parti ariba meimei, manera e habri di un bisti di guera, ku un rant gewef tur ront di e habri, pa e no tornu.

²⁴I nan a traha granatapel di hilu blou, purpura i skarlata i lino fini trosi na zom di e mantel.

²⁵Tambe nan a traha belnan di oro puru i a pone e belnan entre e granatapelnan tur ront na zom di e mantel:

²⁶un bel i un granatapel, un bel i un granatapel, tur ront na zom di e mantel, pa sirbi aden, meskos ku SENOR a ordena Moises.

²⁷I nan a traha e tunikanan di lino fini gewef pa Aaron ku su yu hombernan,

²⁸i e tulban di lino fini, e adornonan di e pananan di lino fini pa mara kabes, i e karsonnan kortiku di lino fini trosi,

²⁹i e faha di lino fini trosi i hilu blou, purpura i skarlata, obra di e wefdo-di-tela, meskos ku SENOR a ordena Moises.

³⁰I nan a traha e plachi di e korona santu di oro puru, i a skirbi riba dje un grabashon manera ta graba seyo: "Santu pa SENOR."

³¹I nan a pega un kordon blou na dje pa pegu'e na e parti ariba di e tulban, meskos ku SENOR a ordena Moises.

³²Asina henter e obra di e tabernakel di e tent di reunion a keda kompleta; i e yunan di Israel a hasi konforme tur loke SENOR a ordena Moises; asina nan a hasie.

³³I nan a hiba e tabernakel pa Moises, e tent ku tur su artikulonan-di-uzo: su haknan, su tablanan, su baranan, su pilarnan i su pianan;

³⁴e kapa di kueru di karne chubatu tina kora, e kapa di kueru di dolfein i e velo di e skerm;

³⁵e arka di testimonio ku su baranan i e propisiatorio;

³⁶e mesa, tur su artikulonan-di-uzo i e pan di e Presensia;

³⁷e kandela di oro puru ku su lampinan poni na ordu, ku tur su artikulonan-di-uzo i e zeta pa e lus;

³⁸i e altar di oro, e zeta di unshon i e sensia aromatiko, i e kortina pa entrada di e tent;

³⁹e altar di brons ku su roster di brons, su baranan i tur su artikulonan-di-uzo, e labamano ku su pia;

⁴⁰e kortinanan pa e plenchi, su pilarnan ku su pianan, i e skerm pa entrada di e plenchi, su kordonnan, su stakanan i tur e artikulonan-di-uzo pa e sirbishi di e tabernakel, pa e tent di reunion;

⁴¹e pananan gewef pa sirbi den e luga santu i e pananan santu pa saserdote Aaron i e pananan di su yu hombernan, pa sirbi komo saserdote.

⁴²Asina e yunan di Israel a hasi tur e trabou konforme tur loke SENOR a ordena Moises.

⁴³I Moises a inspekta tur e trabou, i mira, nan a hasie; meskos ku SENOR a ordena, asina nan a hasie. I Moises a bendishona nan.