Read Papantla Totonac Eksodo 4 Bible Online

Eksodo 4 - Papantla Totonac bible

Eksodo 4

¹E ora ei Moises a kontesta i a bisa: "Supone ku nan no kier keremi, ni tende na loke mi ta bisa. Supone ku nan bisa: 'SENOR no a parese na bo.'"

²I SENOR a bis'e: "Kiko bo tin den bo man ei?" I el a bisa: "Un bara."

³Anto Dios a bisa: "Bent'e abou na suela." I Moises a bent'e abou na suela i el a bira un kolebra, i Moises a hui p'e.

⁴Ma SENOR a bisa Moises: "Saka bo man gar'e na su rabu" (asina Moises a saka su man gar'e, i e kolebra a bira un bara den su man)

⁵"pa nan kere ku SENOR, e Dios di nan tatanan, e Dios di Abraham, e Dios di Isaak i e Dios di Jakob, a parese na bo."

⁶Ademas, SENOR a bis'e: "Awor hinka bo man den bo bus." I Moises a hinka su man den su bus, i ora ku el a sak'e, ata su man tabata leproso manera sneu.

⁷I El a bisa: "Hinka bo man den bo bus atrobe." I el a bolbe hinka su man den su bus, i ora ku el a sak'e for di su bus, ata su man a bolbe bira manera e restu di su karni.

⁸"I lo sosode ku si nan no kier kerebo ni tende na e testimonio di e prome senal, nan lo kere e testimonio di e di dos senal.

⁹Ma lo t'asina ku si nan no kier kere e dos senalnan aki tampoko, ni tende na loke bo ta bisa, e ora ei bo mester saka poko awa for di Neil bash'e riba tera seku, i e awa ku bo saka for di Neil lo bira sanger riba e tera seku."

¹⁰E ora ei Moises a bisa SENOR: "Pa fabor, Senor, nunka mi no tabata un hende elokuente, ni antes, ni desde ku Bo a papia ku Bo sirbido, pasobra mi no por papia bon i mi lenga ta pisa."

¹¹I SENOR a bis'e: "Ta ken a traha boka di hende? Ta ken a traha e mudo, of e sordo, of esun ku ta mira of e siegu? No ta Ami, SENOR?

¹²Bai awor anto, i Ami, si Ami, lo ta ku bo boka i lo sinabo kiko bo mester bisa."

¹³Ma Moises a bisa: "Pa fabor, Senor, manda e mensahe pa medio di esun ku Abo kier manda."

¹⁴E ora ei rabia di SENOR a kima kontra Moises i El a bisa: "E levita Aaron no ta bo ruman? Mi sa ku e por papia bon. Ademas, at'e ta sali bin kontrabo; ora ku e mirabo, e lo ta kontentu den su kurason.

¹⁵I abo mester papia kune i pone e palabranan den su boka; i Ami, si Ami, lo ta ku bo boka i ku su boka, i lo Mi sina boso kiko boso mester hasi.

¹⁶Ademas, e lo papia ku e pueblo pa bo; i lo sosode ku e lo ta manera un boka pa bo, i abo lo ta manera Dios p'e.

¹⁷I bo mester kohe e bara aki den bo man, ku kual bo ta hasi e senalnan."

¹⁸E ora ei Moises a bolbe bai serka su suegro Jetro i a bis'e: "Pa fabor, lagami bai, pa mi bolbe serka mi rumannan ku ta na Egipto i mira si nan ta na bida ainda." I Jetro a bisa Moises: "Bai na pas."

¹⁹Awor na Madian SENOR a bisa Moises: "Bai Egipto bek, pasobra tur e hombernan ku tabata buskabo pa mata a muri."

²⁰E ora ei Moises a tuma su esposa i su yu hombernan i a pone nan riba buriku, i a bolbe pa tera di Egipto. Tambe Moises a kohe e bara di Dios den su man.

²¹I SENOR a bisa Moises: "Ora bo bai bek Egipto, mira pa bo hasi dilanti di Farao tur e maraviyanan ku Mi a pone den bo man; ma Ami lo hasi su kurason duru, asina ku e lo no laga e pueblo bai.

²²E ora ei lo bo bisa Farao: 'Asina SENOR ta bisa: "Israel ta Mi yu homber, Mi primogenito.

²³Pesei Mi a bisabo: 'Laga Mi yu homber bai, pa e sirbiMi'; ma bo a nenga di lagu'e bai. Mira, lo Mi mata bo yu homber, bo primogenito.

²⁴Awor a sosode ku na kaminda, na e posada, SENOR a kontra kune i a busk'e pa mata.

²⁵E ora ei Sefora a kohe un kuchu di piedra i a korta prepusio di su yu homber kit'afo, i a tir'e na pia di Moises i a bisa: "Di berdat, bo ta un bruidehom di sanger pa mi."

²⁶I El a lagu'e bai. E ora ei Sefora a bisa: "Bo ta un bruidehom di sanger"--pa motibu di e sirkumsishon.

²⁷Awor SENOR a bisa Aaron: "Bai kontra ku Moises den desierto." Asina el a bai i a kontra kune na e seru di Dios i el a sunch'e.

²⁸I Moises a konta Aaron tur e palabranan di SENOR ku kualnan El a mand'e, i tur e senalnan ku El a orden'e pa hasi.

²⁹E ora ei Moises i Aaron a bai i a reuni tur e ansianonan di e yunan di Israel;

³⁰i Aaron a papia tur e palabranan ku SENOR a papia ku Moises. Despues el a hasi e senalnan den bista di e pueblo.

³¹I e pueblo a kere; i ora nan a tende ku SENOR a bishita e yunan di Israel i ku El a mira nan aflikshon, nan a buig te na suela i a adora.