Read Papantla Totonac Eksodo 40 Bible Online

Eksodo 40 - Papantla Totonac bible

Eksodo 40

¹E ora ei SENOR a papia ku Moises, bisando:

²"Riba e prome dia di e prome luna bo mester lanta e tabernakel di e tent di reunion.

³I pone e arka di testimonio ayanan i pone e velo di tal manera ku e arka no ta wordu mira.

⁴I hiba e mesa paden i prepara loke mester tin riba dje, i hiba e kandela paden i sende su lampinan.

⁵Ademas, bo mester pone e altar di oro pa sensia dilanti di e arka di testimonio, i pone e velo na entrada di e tabernakel.

⁶"I pone e altar di ofrenda kima dilanti di entrada di e tabernakel di e tent di reunion.

⁷I pone e labamano entre e tent di reunion i e altar i pone awa aden.

⁸I kologa e kortinanan di e plenchi tur ront i pone e skerm na entrada di e plenchi.

⁹"E ora ei bo mester kohe e zeta di unshon i ungi e tabernakel i tur loke tin den dje, i konsagr'e i tur su artikulonan-di-uzo; i e lo ta santu.

¹⁰I ungi e altar di ofrenda kima i tur su artikulonan-di-uzo, i konsagra e altar; i e altar lo ta masha santu mes.

¹¹I ungi e labamano ku su pia i konsagr'e.

¹²"E ora ei bo mester hiba Aaron ku su yu hombernan na entrada di e tent di reunion i laba nan ku awa.

¹³I bisti Aaron e pananan santu i ungie i konsagr'e, pa e sirbiMi komo saserdote.

¹⁴I trese su yu hombernan i bisti nan nan tunikanan;

¹⁵i ungi nan meskos ku bo a ungi nan tata, pa nan sirbiMi komo saserdote; i nan unshon lo kualifika nan pa un saserdosio perpetuo durante di tur nan generashonnan."

¹⁶Asina Moises a hasi; konforme tur loke SENOR a orden'e, asina el a hasi.

¹⁷Awor a sosode ku den e prome luna di e di dos ana, riba e prome dia di e luna, e tabernakel a wordu lanta.

¹⁸I Moises a lanta e tabernakel i a pone su pianan, a lanta su tablanan i a pasa su baranan i a lanta su pilarnan.

¹⁹I el a habri e tent ofer di e tabernakel i a pone e kapa pa e tent riba dje, meskos ku SENOR a ordena Moises.

²⁰E ora ei el a kohe e testimonio i a pon'e den e arka, i a pega e baranan na e arka i a pone e propisiatorio riba e arka.

²¹I el a hiba e arka den e tabernakel i a kologa e velo di e skerm di tal manera ku e arka di testimonio no tabata wordu mira, meskos ku SENOR a ordena Moises.

²²E ora ei el a pone e mesa den e tent di reunion, na e banda nort di e tabernakel, pafo di e velo.

²³I el a pone e pan kla riba dje dilanti di SENOR, meskos ku SENOR a ordena Moises.

²⁴E ora ei el a pone e kandela den e tent di reunion, enfrente di e mesa, na e banda suit di e tabernakel.

²⁵I el a sende e lampinan dilanti di SENOR, meskos ku SENOR a ordena Moises.

²⁶E ora ei el a pone e altar di oro den e tent di reunion dilanti di e velo;

²⁷i el a kima sensia aromatiko riba dje, meskos ku SENOR a ordena Moises.

²⁸E ora ei el a kologa e kortina pa entrada di e tabernakel.

²⁹I el a pone e altar di ofrenda kima dilanti di entrada di e tabernakel di e tent di reunion, i a ofrese riba dje e ofrenda kima i e ofrenda di mainshi, meskos ku SENOR a ordena Moises.

³⁰I el a pone e labamano entre e tent di reunion i e altar, i a pone awa aden pa laba.

³¹I for di dje Moises i Aaron ku su yu hombernan tabata laba nan man i nan pia.

³²Ora nan tabata drenta e tent di reunion i ora nan tabata aserka e altar, nan tabata laba nan mes, meskos ku SENOR a ordena Moises.

³³I el a kologa e kortinanan di e plenchi tur ront di e tabernakel i e altar, i a kologa e kortina na entrada di e plenchi. Asina Moises a kaba ku e trabou.

³⁴E ora ei e nubia a tapa e tent di reunion, i e gloria di SENOR a yena e tabernakel.

³⁵I Moises no tabata por a drenta e tent di reunion, pasobra e nubia tabata riba e tent, i e gloria di SENOR a yena e tabernakel.

³⁶I ki ora ku e nubia tabata wordu lanta for di riba e tabernakel, e yunan di Israel tabata sigui nan kaminda, durante di tur nan biahenan;

³⁷ma si e nubia no a wordu lanta, nan no tabata sigui nan kaminda te dia ku e wordu lanta.

³⁸Pasobra durante di tur nan biahenan e nubia di SENOR tabata riba e tabernakel den dia, i tabatin kandela den e nubia anochi, den bista di henter kas di Israel.