Read Papantla Totonac Eksodo 6 Bible Online

Eksodo 6 - Papantla Totonac bible

Eksodo 6

¹E ora ei SENOR a bisa Moises: "Awor lo bo mira kiko Mi ta bai hasi ku Farao; pasobra pa motibu di un man poderoso e lo laga nan bai, i pa motibu di un man poderoso e lo kore ku nan for di su tera."

²Dios a sigui papia ku Moises i a bis'e: "Ami ta SENOR;

³i Mi a parese na Abraham, Isaak i Jakob komo Dios Todopoderoso, ma ku Mi nomber, SENOR, Mi no a hasi Mi mes konosi na nan.

⁴I tambe Mi a stablese Mi aliansa ku nan, pa duna nan tera di Kanaan, e tera kaminda nan a keda biba pa un tempu.

⁵I ademas, Mi a tende e kehamentu di e yunan di Israel, pasobra e egipsionan ta tene nan bou di sklabitut; i Mi a korda riba Mi aliansa.

⁶"Pesei, bisa e yunan di Israel: 'Ami ta SENOR, i Ami lo saka boso for di bou di e karganan di e egipsionan, i lo Mi libra boso for di nan sklabitut. Tambe lo Mi redimi boso ku un brasa ekstendi i ku huisionan pisa.

⁷I lo Mi tuma boso komo Mi pueblo, i lo Mi ta boso Dios; i boso lo sa ku Ami ta SENOR boso Dios, Kende a saka boso for di bou di e karganan di e egipsionan.

⁸I lo Mi hiba boso na e tera ku Mi a hura di duna Abraham, Isaak i Jakob, i lo Mi duna boso esaki komo un erensia; Ami ta SENOR.'"

⁹Di e manera aki Moises a papia ku e yunan di Israel, ma nan no a skucha Moises pa motibu di falta di animo i pa motibu di sklabitut kruel.

¹⁰Awor SENOR a papia ku Moises, bisando:

¹¹"Bai bisa Farao, rei di Egipto, pa laga e yunan di Israel sali for di su tera."

¹²Ma Moises a papia dilanti di SENOR, bisando: "Mira, e yunan di Israel no a skuchami. Kon anto Farao lo skuchami, siendo ku mi no ta papia bon?"

¹³E ora ei SENOR a papia ku Moises i ku Aaron, i a duna nan un ordu pa e yunan di Israel i pa Farao, rei di Egipto, pa saka e yunan di Israel for di tera di Egipto.

¹⁴Esakinan ta e kabesnan di e kasnan di nan tatanan. E yu hombernan di Ruben, Israel su primogenito, tabata Hanok i Palu, Hezron i Karmi; esakinan ta e famianan di Ruben.

¹⁵I e yu hombernan di Simeon tabata Jemuel, Jamin, Ohad, Jakin, Zohar i Saul, yu homber di un muhe kananeo; esakinan ta e famianan di Simeon.

¹⁶I esakinan ta e nombernan di e yu hombernan di Levi segun nan generashonnan: Gerson, Koat i Merari; i Levi a biba shent'i trint'i shete ana.

¹⁷E yu hombernan di Gerson tabata Libni i Simei, segun nan famianan.

¹⁸I e yu hombernan di Koat tabata Amram, Izhar, Hebron i Uziel; i Koat a biba shent'i trint'i tres ana.

¹⁹I e yu hombernan di Merari tabata Mahli i Musi. Esakinan ta e famianan di e levitanan segun nan generashonnan.

²⁰I Amram a kasa ku Jokabed, ruman muhe di su tata, i Jokabed a hana Aaron i Moises p'e; i Amram a biba shent'i trint'i shete ana.

²¹I e yu hombernan di Izhar tabata Kore, Nefeg i Zikri.

²²I e yu hombernan di Uziel tabata Misael, Elzafan i Sitri.

²³Aaron a kasa ku Eliseba, yu muhe di Aminadab, ruman muhe di Nason; i Eliseba a hana Nadab i Abiu, Eleazar i Itamar p'e.

²⁴I e yu hombernan di Kore tabata Asir, Elkana i Abiasaf; esakinan ta e famianan di e koreitanan.

²⁵I Eleazar, yu homber di Aaron, a kasa ku un di e yu muhenan di Putiel, i el a hana Finees p'e. Esakinan ta e kabesnan di e kasnan di e tatanan di e levitanan segun nan famianan.

²⁶Ta ku e mesun Aaron i Moises aki SENOR a papia, bisando: "Saka e yunan di Israel for di tera di Egipto segun nan ehersitonan."

²⁷Esakinan ta esnan ku a papia ku Farao, rei di Egipto, pa saka e yunan di Israel for di Egipto; ta e mesun Moises i Aaron.

²⁸Awor a sosode ku dia SENOR a papia ku Moises na tera di Egipto,

²⁹SENOR a papia ku Moises, bisando: "Ami ta SENOR. Bisa Farao, rei di Egipto, tur loke Mi bisabo."

³⁰Ma Moises a bisa dilanti di SENOR: "Mira, mi no ta papia bon; kon anto Farao lo skuchami?"