Read Papantla Totonac Eksodo 7 Bible Online

Eksodo 7 - Papantla Totonac bible

Eksodo 7

¹E ora ei SENOR a bisa Moises: "Mira, Mi ta hasibo manera Dios pa Farao, i bo ruman Aaron lo ta bo profeta.

²Bo mester papia tur loke Mi ordenabo, i bo ruman Aaron mester papia ku Farao pa e laga e yunan di Israel sali for di su tera.

³Ma lo Mi hasi Farao su kurason duru pa Mi multiplika Mi senalnan i Mi maraviyanan na tera di Egipto.

⁴Ora Farao no kier skuchabo, lo Mi pone Mi man riba Egipto i saka Mi ehersitonan, Mi pueblo, e yunan di Israel, for di tera di Egipto pa medio di huisionan pisa.

⁵I e egipsionan lo sa ku ta Ami ta SENOR, ora Mi ekstende Mi man riba Egipto i saka e yunan di Israel for di meimei di nan."

⁶Asina Moises i Aaron a hasi; manera SENOR a ordena nan, asina nan a hasi.

⁷I Moises tabatin ochenta ana i Aaron ochent'i tres, dia ku nan a papia ku Farao.

⁸Awor SENOR a papia ku Moises i Aaron, bisando:

⁹"Ora Farao papia ku boso, bisando: 'Hasi un milager,' e ora ei bo mester bisa Aaron: 'Kohe bo bara i bent'e abou na suela dilanti di Farao pa e bira kolebra.'"

¹⁰Asina Moises i Aaron a yega serka Farao i nan a hasi meskos ku SENOR a ordena; i Aaron a benta su bara abou na suela dilanti di Farao i su sirbidonan, i esaki a bira kolebra.

¹¹E ora ei Farao tambe a manda yama e sabionan i e hasidonan di bruha, i nan tambe, esta e magonan di Egipto, ku nan trikinan magiko, a hasi meskos.

¹²Pasobra kada un a benta su bara abou na suela i nan a bira kolebra. Ma e bara di Aaron a guli nan baranan.

¹³Sinembargo, Farao su kurason a keda duru i e no a skucha nan, manera SENOR a bisa.

¹⁴E ora ei SENOR a bisa Moises: "Farao su kurason ta duru; e ta nenga di laga e pueblo bai.

¹⁵Bai serka Farao mainta ora ku e ta sali bai na e awa, i para ward'e kantu di Neil, i tene e bara, ku a bira kolebra, den bo man.

¹⁶I bis'e: 'SENOR, e Dios di e hebreonan, a mandami serka bo, bisando: "Laga Mi pueblo bai pa nan sirbiMi den desierto. Ma mira, te awor bo no a skucha."

¹⁷Asina SENOR ta bisa: "Dor di esaki lo bo sa ku ta Ami ta SENOR: mira, lo mi bati ku e bara ku ta den mi man riba e awa ku tin den Neil, i esaki lo bira sanger.

¹⁸E piskanan den Neil lo muri, i Neil lo hole malu; i e egipsionan lo no por bebe e awa di Neil.

¹⁹E ora ei SENOR a bisa Moises: "Bisa Aaron: 'Kohe bo bara i ekstende bo man ofer di e awanan di Egipto, ofer di nan riunan, ofer di nan kanalnan, ofer di nan plasnan di awa i ofer di tur nan bakinan di awa, pa nan bira sanger; i lo tin sanger tur kaminda na tera di Egipto, tantu den e artikulonan-di-uzo traha di palu komo den esnan traha di piedra.'"

²⁰Asina Moises i Aaron a hasi manera SENOR a ordena. I el a lanta e bara i a dal riba e awa ku tabatin den Neil, den bista di Farao i den bista di su sirbidonan, i tur e awa ku tabatin den Neil a bira sanger.

²¹I e piskanan ku tabatin den Neil a muri, i Neil tabata hole malu, asina ku e egipsionan no por a bebe awa for di Neil. I tabatin sanger tur kaminda na tera di Egipto.

²²Ma e magonan di Egipto a hasi meskos ku nan trikinan magiko; i Farao su kurason a keda duru i e no a skucha nan, manera SENOR a bisa.

²³Anto Farao a bira bai den su kas sin preokupa pa esaki tampoko.

²⁴Asina e egipsionan tur a koba tur ront di Neil pa buska awa pa bebe, pasobra nan no por a bebe e awa di Neil.

²⁵I shete dia a pasa despues ku SENOR a dal Neil.