Read Papantla Totonac Eksodo 8 Bible Online

Eksodo 8 - Papantla Totonac bible

Eksodo 8

¹E ora ei SENOR a bisa Moises: "Bai serka Farao i bis'e: 'Asina SENOR ta bisa: "Laga Mi pueblo bai pa nan sirbiMi.

²Ma si bo nenga di laga nan bai, mira, lo Mi afligi henter bo teritorio ku dori.

³I Neil lo ta yen-yen di dori ku lo sali bai den bo kas, den bo kamber di drumi, riba bo kama, den e kasnan di bo sirbidonan, riba bo pueblo, den bo fornunan i den bo komchinan-pa-traha-mansa.

⁴Asina e dorinan lo sali bin riba bo, riba bo pueblo i riba tur bo sirbidonan.

⁵E ora ei SENOR a bisa Moises: "Bisa Aaron: 'Ekstende bo man ku bo bara ofer di e riunan, ofer di e kanalnan i ofer di e plasnan di awa, i hasi dori sali bin riba tera di Egipto.'"

⁶Asina Aaron a ekstende su man ofer di e awanan di Egipto, i e dorinan a sali i a tapa tera di Egipto.

⁷I e magonan a hasi meskos ku nan trikinan magiko, i nan a hasi dori sali bin riba tera di Egipto.

⁸E ora ei Farao a manda yama Moises i Aaron i a bisa: "Roga SENOR pa E kita e dorinan for di mi i for di mi pueblo; i lo mi laga e pueblo bai pa nan ofrese sakrifisio na SENOR."

⁹I Moises a bisa Farao: "E onor ta na bo pa bisami ki dia mi tin di roga pa bo, pa bo sirbidonan i pa bo pueblo, pa e dorinan wordu destrui for di bo i for di bo kasnan, pa nan keda den Neil so."

¹⁰E ora ei el a bisa: "Manan." Pesei Moises a bisa: "Ku sosode konforme bo palabra, pa bo sa ku no tin ni un manera SENOR nos Dios.

¹¹I e dorinan lo bai for di bo, for di bo kasnan, for di bo sirbidonan i for di bo pueblo; nan lo keda den Neil so."

¹²E ora ei Moises i Aaron a bai for di presensia di Farao, i Moises a sklama na SENOR tokante di e dorinan ku El a pone kontra Farao.

¹³I SENOR a hasi konforme e palabra di Moises, i e dorinan a muri bai for di e kasnan, for di e plenchinan i for di e kunukunan.

¹⁴Anto nan a hala e dorinan pone na monton, i e tera tabata hole malu.

¹⁵Ma ora Farao a mira ku tabatin alivio, el a hasi su kurason duru i no a skucha nan, manera SENOR a bisa.

¹⁶E ora ei SENOR a bisa Moises: "Bisa Aaron: 'Saka bo bara i dal e stof di tera, pa esei bira pieu den henter tera di Egipto.'"

¹⁷I asina nan a hasi; i Aaron a saka su man ku su bara den su man i a dal e stof di tera, i tabatin pieu riba hende i bestia. Tur e stof di tera a bira pieu den henter tera di Egipto.

¹⁸I e magonan a trata di produsi pieu ku nan trikinan magiko, ma nan no tabata por; asina tabatin pieu riba hende i bestia.

¹⁹E ora ei e magonan a bisa Farao: "Esaki ta e dede di Dios." Ma Farao su kurason a keda duru i e no a skucha nan, manera SENOR a bisa.

²⁰Awor SENOR a bisa Moises: "Lanta mainta tempran i presenta bo mes dilanti di Farao ora ku e ta sali bai na e awa, i bis'e: 'Asina SENOR ta bisa: "Laga Mi pueblo bai, pa nan sirbiMi.

²¹Pasobra si bo no kier laga Mi pueblo bai, mira, lo Mi manda muska na kantidat riba bo, riba bo sirbidonan, riba bo pueblo i den bo kasnan; i e kasnan di e egipsionan lo ta yen-yen di muska, i tambe e suela ku nan ta biba ariba.

²²"Ma e dia ei lo Mi separa tera di Gosen, kaminda Mi pueblo ta biba, asina ku lo no tin muska mas ayanan, pa bo sa ku Ami, SENOR, ta meimei di e tera.

²³I lo Mi pone un divishon entre Mi pueblo i bo pueblo. Manan e senal aki lo sosode.

²⁴Anto asina SENOR a hasi. A bai muska na kantidat den e kas di Farao i den e kasnan di su sirbidonan, i e tera a keda ruina pa motibu di e muskanan na henter tera di Egipto.

²⁵E ora ei Farao a manda yama Moises i Aaron i a bisa: "Bai, ofrese sakrifisio na boso Dios den e tera aki."

²⁶I Moises a bisa: "No ta korekto pa hasi asina, pasobra nos lo ofrese komo sakrifisio na SENOR nos Dios loke ta un abominashon pa e egipsionan. Si nos ofrese komo sakrifisio loke ta un abominashon den bista di e egipsionan, nan lo no piedra nos?

²⁷Nos mester hasi un biahe di tres dia den desierto i ofrese sakrifisio na SENOR nos Dios, manera E ta ordena nos."

²⁸I Farao a bisa: "Mi ta laga boso bai, pa boso ofrese sakrifisio na SENOR boso Dios den desierto, kontal ku boso no bai muchu leu. Hasi suplika pa mi."

²⁹E ora ei Moises a bisa: "Mira, mi ta bai for di bo presensia i lo mi hasi suplika na SENOR pa manan e muskanan kita for di Farao, for di su sirbidonan i for di su pueblo; kontal ku Farao no trata ku engano atrobe dor di no laga e pueblo bai ofrese sakrifisio na SENOR."

³⁰Asina Moises a bai laga Farao i a hasi suplika na SENOR.

³¹I SENOR a hasi manera Moises a pidi i a kita e muskanan for di Farao, for di su sirbidonan i for di su pueblo; no a keda ni un.

³²Ma e biaha aki tambe Farao a hasi su kurason duru i e no a laga e pueblo bai.