Read Papantla Totonac Eksodo 9 Bible Online

Eksodo 9 - Papantla Totonac bible

Eksodo 9

¹E ora ei SENOR a bisa Moises: "Bai serka Farao i bis'e: 'Asina SENOR, e Dios di e hebreonan, ta bisa: "Laga Mi pueblo bai pa nan sirbiMi.

²Pasobra si bo nenga di laga nan bai i sigui tene nan,

³mira, e man di SENOR lo bin ku un plaga masha pisa riba bo bestianan di kria ku ta den kunuku, riba e kabainan, riba e burikunan, riba e kamelnan, riba e bakanan i riba e bestianan chikitu.

⁴Ma SENOR lo hasi distinshon entre e bestianan di kria di Israel i e bestianan di kria di Egipto, asina ku nada di loke ta pertenese na e yunan di Israel lo no muri.

⁵I SENOR a pone un tempu fiho, bisando: "Manan SENOR lo hasi e kos aki den e tera."

⁶Asina ku su manise SENOR a hasi e kos aki i tur e bestianan di kria di Egipto a muri; ma di e bestianan di kria di e yunan di Israel ni un no a muri.

⁷I Farao a manda investiga, i mira, ni sikiera un di e bestianan di kria di Israel no a muri. Ma Farao su kurason a keda duru i e no a laga e pueblo bai.

⁸E ora ei SENOR a bisa Moises i Aaron: "Kohe pa boso mes mannan yen di chemene for di un fornu di klei, i laga Moises tira esaki den laira den bista di Farao.

⁹I esaki lo bira stof fini den henter tera di Egipto, i lo bira blufein ku ta habri na herida riba hende i bestia den henter tera di Egipto."

¹⁰Pesei nan a kohe chemene for di un fornu di klei i a bai para dilanti di Farao; i Moises a tira esaki den laira i el a bira blufein ku ta habri na herida riba hende i bestia.

¹¹I e magonan no por a para dilanti di Moises pa motibu di e blufeinnan, pasobra tantu e magonan komo tur e egipsionan tabata tur na blufein.

¹²Anto SENOR a hasi Farao su kurason duru, i Farao no a skucha nan, meskos ku SENOR a bisa Moises.

¹³E ora ei SENOR a bisa Moises: "Lanta mainta tempran i bai para dilanti di Farao i bis'e: 'Asina SENOR, e Dios di e hebreonan, ta bisa: "Laga Mi pueblo bai pa nan sirbiMi.

¹⁴Pasobra e biaha aki lo Mi manda tur Mi plaganan riba bo, riba bo sirbidonan i riba bo pueblo, pa bo sa ku no tin ni un manera Ami den henter tera.

¹⁵Pasobra awor lo Mi saka Mi man pa dal abo i bo pueblo ku un plaga, i lo bo wordu korta kita for di tera.

¹⁶Ma di berdat, pa e motibu aki Mi a permitibo keda na bida, pa mustrabo Mi poder i pa proklama Mi nomber den henter mundu.

¹⁷Ma ainda bo ta halsa bo mes kontra Mi pueblo dor di no laga nan bai.

¹⁸Mira, manan na e ora aki lo Mi hasi hagel yobe masha pisa, manera no a wordu mira na Egipto for di dia ku el a wordu funda te awor.

¹⁹Awor, duna ordu pa buska bo bestianan di kria i trese nan i tur loke bo tin den kunuku, pone nan den siguridat. Tur hende i bestia ku wordu hana den kunuku i ku no a wordu hiba kas lo muri ora hagel kai riba nan.

²⁰Esun entre Farao su sirbidonan ku tabata teme e palabra di SENOR a manda su sirbidonan pura hiba su bestianan di kria paden;

²¹ma esun ku no a hasi kaso di e palabra di SENOR a laga su sirbidonan i su bestianan di kria keda den kunuku.

²²Awor SENOR a bisa Moises: "Ekstende bo man na shelu, pa hagel kai riba henter tera di Egipto, riba hende, riba bestia i riba tur mata di kunuku den henter tera di Egipto."

²³Anto Moises a ekstende su bara na shelu i SENOR a manda strena i hagel, i kandela tabata basha bin riba tera. I SENOR a hasi hagel yobe riba tera di Egipto.

²⁴Asina tabatin hagel, i kandela meskla ku hagel, masha pisa mes, manera no tabatin nunka na henter tera di Egipto for di dia ku esaki a bira un nashon.

²⁵I e hagel a bati tur loke tabatin den kunuku na henter tera di Egipto, tantu hende komo bestia; tambe e hagel a bati tur mata di kunuku i a kibra tur palu di kunuku na pida-pida.

²⁶Solamente na tera di Gosen, kaminda e yunan di Israel tabata, no tabatin hagel.

²⁷E ora ei Farao a manda yama Moises i Aaron i a bisa nan: "E biaha aki mi a peka; SENOR ta Esun hustu, i ami ku mi pueblo ta esnan malbado.

²⁸Hasi suplika na SENOR, pasobra nos a hana basta di Dios Su strena i hagel kaba; i lo mi laga boso bai, i boso lo no keda mas."

²⁹I Moises a bis'e: "Asina mi sali for di stat, lo mi ekstende mi mannan na SENOR; e strena lo stop i lo no tin hagel mas, pa bo sa ku tera ta di SENOR.

³⁰Ma pa loke t'abo i bo sirbidonan, mi sa ku ainda boso no ta teme SENOR Dios."

³¹Awor e lino i e puspas a wordu ruina, pasobra e puspas tabata na tapushi i e lino tabata na flor.

³²Ma e trigo i e senteno no a wordu ruina, pasobra nan ta hecha lat.

³³I Moises a sali for di stat bai laga Farao, i a ekstende su mannan na SENOR; i e strena i e hagel a stop i awaseru no a basha mas riba tera.

³⁴Ma ora Farao a mira ku e awaseru, e hagel i e strena a stop, el a bolbe peka i a hasi su kurason duru, e ku su sirbidonan.

³⁵I Farao su kurason a keda duru i e no a laga e yunan di Israel bai, meskos ku SENOR a papia pa medio di Moises.