Read Papantla Totonac Job 1 Bible Online

Job 1 - Papantla Totonac bible

Job 1

¹Tabatin un homber na tera di Uz ku yama Job. I e homber ei tabata perfekto i rekto, un hende ku tabata teme Dios i ku tabata aparta su mes for di maldat.

²I e tabatin shete yu homber i tres yu muhe.

³Su propiedatnan tabata shete mil karne, tres mil kamel, sinku shen yugo di buey, sinku shen buriku yewa i masha hopi sirbido; i e homber ei tabata esun di mas grandi di tur e hombernan di oriente.

⁴I su yu hombernan tabatin kustumber di hasi fiesta na nan kas, kada un riba su dia, i nan tabata manda kombida nan tres ruman muhenan pa bin kome i bebe huntu ku nan.

⁵I a sosode ku kada bes ku e dianan di fiesta a pasa, Job tabata manda buska nan i konsagra nan; e tabata lanta mainta tempran i ofrese ofrendanan kima pa kada un di nan, pasobra Job tabata bisa: "Por ta ku mi yu hombernan a peka i a maldishona Dios den nan kurason." Asina Job tabata hasi kontinuamente.

⁶Awor a yega un dia ku e yu hombernan di Dios a bin pa presenta nan mes dilanti di SENOR, i Satanas tambe a bin den nan.

⁷I SENOR a bisa Satanas: "For di unda bo ta bin?" E ora ei Satanas a kontesta SENOR i a bisa: "For di bai-bin riba tera i di kana pariba-pabou den dje."

⁸I SENOR a bisa Satanas: "Bo a konsidera Mi sirbido Job? Pasobra no tin ningun hende manera e riba tera, un hende perfekto i rekto, ku ta teme Dios i ku ta aparta su mes for di maldat."

⁹E ora ei Satanas a kontesta SENOR: "Ta pornada Job ta teme Dios?

¹⁰Bo no a traha un trankera ront di dje, ront di su kas, i ront di tur loke e tin na tur banda? Bo a bendishona e trabou di su man, i su propiedatnan a oumenta den e tera.

¹¹Ma saka Bo man awor i mishi ku tur loke e tin; siguramente e lo maldishonaBo den Bo kara."

¹²E ora ei SENOR a bisa Satanas: "Ata, tur loke e tin ta den bo poder; solamente, no pone bo man riba dje." Asina Satanas a bai for di e presensia di SENOR.

¹³Awor a sosode ku riba e dia ku su yu hombernan i su yu muhenan tabata kome i bebe bina den kas di nan ruman homber mayo,

¹⁴un mensahero a yega serka Job i a bisa: "E bueynan tabata plug i e burikunan tabata kome banda di nan,

¹⁵i e sabeonan a ataka i a kohe nan bai kune. Tambe nan a mata e sirbidonan ku filo di spada, i ami so a skapa pa kontabo."

¹⁶Mientras ku esaki tabata papia ainda, un otro mas a yega i a bisa: "E kandela di Dios a kai for di shelu i a kima e karnenan i e sirbidonan i a kaba ku nan; i ami so a skapa pa kontabo."

¹⁷Mientras ku esaki tabata papia ainda, un otro mas a yega i a bisa: "E kaldeonan a forma tres trupa i a ataka e kamelnan i a kohe nan bai kune, i a mata e sirbidonan ku filo di spada; i ami so a skapa pa kontabo."

¹⁸Mientras ku esaki tabata papia ainda, un otro mas a yega i a bisa: "Bo yu hombernan i bo yu muhenan tabata kome i bebe bina den kas di nan ruman homber mayo,

¹⁹i mira, un bientu fuerte a pasa ofer di e desierto bin, i a suta e kuater skinanan di e kas, i e kas a kai riba e hobennan i nan a muri; i ami so a skapa pa kontabo."

²⁰E ora ei Job a lanta, a sker su pananan i a feita su kabes; i el a tira su kurpa abou ku su kara te na suela i a adora.

²¹I el a bisa: "Sunu mi a sali for di barika di mi mama, i sunu lo mi bolbe einan. SENOR a duna i SENOR a kita. Bendishona sea e nomber di SENOR."

²²Den tur esaki Job no a peka ni e no a kulpa Dios.