Read Papantla Totonac Job 10 Bible Online

Job 10 - Papantla Totonac bible

Job 10

¹"Mi ta despresia mi mes bida; lo mi duna rienda suelta na mi keho; lo mi papia den e amargura di mi alma.

²Lo mi bisa Dios: 'No kondenami; lagami sa pakiko Bo ta pleita ku mi.

³Ta parseBo bon pa oprimi, pa rechasa e obra di Bo mannan i faborese konseho di e malbado?

⁴Bo tin wowo di karni? Of Bo ta mira manera hende ta mira?

⁵Akaso Bo dianan ta manera dianan di hende mortal, of Bo ananan ta manera ananan di hende,

⁶ku Bo mester buska mi inikidat i investiga mi pika-¬

⁷maske Bo sa ku mi no ta malbado i ku no tin ningun hende ku por libra for di Bo man?

⁸'Ta Bo man a trahami i a formami kompletamente; i awor Bo kier destruimi?

⁹Korda ku Bo a trahami manera klei; i awor Bo kier hasimi bolbe na stof atrobe?

¹⁰Bo no a bashami manera lechi, i kuahami manera keshi?

¹¹Bo no a bistimi ku kueru i karni, i a wef mi pega na otro ku wesu i spir?

¹²Bo a dunami bida i miserikordia, i Bo kuido a preserva mi spiritu.

¹³'Ma e kosnan aki Bo a skonde den Bo kurason; mi sa ku esaki ta den Bo:

¹⁴si mi a peka, lo Bo a tuma nota di mi, i lo no a librami di mi inikidat.

¹⁵Si mi ta malbado, ai di mi! I si mi ta hustu mes, mi no ta tribi halsa mi kabes. Mi ta yen di berguensa i konsiente di mi miseria.

¹⁶I si mi mester a halsa mi kabes, lo Bo a yag riba mi manera un leon; i atrobe lo Bo a mustra Bo poder kontra mi.

¹⁷Bo ta bin ku testigunan nobo kontra mi, i ta oumenta Bo rabia riba mi; mi ta hanami den difikultat tras difikultat.

¹⁸'Pakiko anto Bo a sakami for di matris? Mara mi a muri sin ku ningun wowo a mirami!

¹⁹Lo mi tabata komo si fuera mi no tabata eksisti, hiba di barika pa graf.'

²⁰Mi dianan no ta poko? Lagami na pas, pa mi por tin un tiki konsuelo

²¹prome ku mi bai--sin bolbe mas-- na e tera di skuridat i sombra profundo,

²²un tera mes skur ku skuridat mes, di sombra profundo sin ningun ordu, kaminda asta lus ta manera skuridat."