Read Papantla Totonac Job 11 Bible Online

Job 11 - Papantla Totonac bible

Job 11

¹E ora ei Zofar e naamatita a kontesta:

²"Akaso un kantidat grandi di palabra mester keda sin wordu kontesta, i un homber papiado wordu hustifika?

³Bo gabamentu lo hasi hende keda ketu? I lo bo hasi bofon sin ku ningun hende reprendebo?

⁴Pasobra bo a bisa: 'Mi sinansa ta puru, i mi ta inosente den bo bista.'

⁵Ma ohala ku Dios lo a papia, i habri Su lepnan kontra bo,

⁶i mustrabo e sekretonan di sabiduria! Pasobra sabiduria sano tin dos banda. Sabi anto ku Dios ta lubida un parti di bo inikidat.

⁷"Bo por deskubri e profundidatnan di Dios? Bo por deskubri e limitenan di e Todopoderoso?

⁸Nan ta mes haltu ku e shelunan, kiko bo por hasi? Mas profundo ku Seol, kiko bo por sa?

⁹Su midi ta mas largu ku mundu, i mas hanchu ku laman.

¹⁰"Si E pasa, kohe prezo, i tene rat, ken por strob'E?

¹¹Pasobra E konose hende falsu, i E ta mira inikidat sin investiga.

¹²I un hende kabes bashi lo bira inteligente dia ku un yu di buriku di mondi nase hende.

¹³"Si bo kier prepara bo kurason, i ekstende bo man na djé;

¹⁴si tin inikidat den bo man, tir'e leu for di bo, i no laga maldat keda biba den bo tentnan.

¹⁵Anto, di berdat, bo por hisa bo kara sin ningun berguensa, i lo bo para firme i sin miedu.

¹⁶Pasobra lo bo lubida bo miseria, i kord'e manera awanan ku a kore pasa kaba.

¹⁷I bo bida lo ta mas kla ku merdia; skuridat lo ta manera mainta.

¹⁸E ora ei lo bo konfia, pasobra tin speransa; i lo bo wak ront i keda trankil di bo.

¹⁹Lo bo kai drumi i ningun hende lo no molestiabo, i hopi lo buska bo fabor.

²⁰Ma wowo di e malbadonan lo faya, i lo no tin skapatorio pa nan; i nan speransa ta pa hala nan ultimo rosea."