Read Papantla Totonac Job 13 Bible Online

Job 13 - Papantla Totonac bible

Job 13

¹"Ata, mi wowo a mira tur esaki, mi orea a tende i a komprende esei.

²Loke boso sa mi tambe sa. Mi no ta inferior na boso.

³Ma ami lo kier a papia ku e Todopoderoso, i mi ta desea di rasona ku Dios.

⁴Ma boso ta tapa e berdat ku boso mentiranan; boso tur ta dokternan ku no bal nada.

⁵Mara boso por a keda ketu, i ku esei lo a bira boso sabiduria!

⁶Awor tende mi argumento, i skucha e rogamentu di mi lepnan.

⁷Boso kier papia loke ta inhustu na fabor di Dios, i papia loke ta enganoso na Su fabor?

⁸Boso kier tuma parti p'E? Boso kier pleita pa Dios?

⁹Lo ta bon si E skudrina boso? Boso kier gan'E, manera boso ta gana hende?

¹⁰E lo reprende boso sigur, si na sekreto boso mustra parsialidat.

¹¹Su mahestat lo no terorisa boso? I temor di djé lo no kai riba boso?

¹²Boso dichonan memorabel ta proverbionan di shinishi, boso defensanan ta defensanan di klei.

¹³"Keda ketu mi dilanti pa mi por papia; anto laga bin riba mi loke mester bin.

¹⁴Pakiko mi mester kita mi karni ku mi djentenan, i tuma mi bida den mi man?

¹⁵Maske E matami, tog lo mi konfia den djé. Sinembargo, lo mi defende mi kamindanan Su dilanti.

¹⁶Esaki tambe lo ta mi salbashon, pasobra un hende sin Dios no mag bin den Su presensia.

¹⁷Skucha mi palabranan ku atenshon, i laga mi deklarashon yena boso orea.

¹⁸At'awor, mi a prepara mi kaso; mi sa ku lo mi wordu hustifika.

¹⁹Ken ta esun ku lo pleita ku mi? Pasobra e ora ei lo mi keda ketu i muri.

²⁰"Solamente dos kos no hasi ku mi, e ora ei lo mi no skonde pa Bo:

²¹kita Bo man for di mi, i no laga temor pa Bo terorisami.

²²E ora ei yama, i lo mi kontesta; of lagami papia, e ora ei Abo kontestami.

²³Kuantu mi inikidatnan i mi pikanan ta? Hasimi konose mi transgreshon i mi pika.

²⁴Pakiko Bo ta skonde Bo kara, i ta konsiderami Bo enemigu?

²⁵Lo Bo spanta un blachi ku a bula bai? Of lo Bo persigui bagas seku?

²⁶Pasobra Bo ta skirbi kosnan amargo kontra mi, i ta hasimi ereda e inikidatnan di mi hubentut.

²⁷Bo ta pone mi pianan na sepa, i ta opserva tur mi berehanan; Bo ta pone un limite pa mi plant'i pia,

²⁸mientras ku mi ta kabando manera kos putri, manera un bisti ku mot a kome.