Read Papantla Totonac Job 15 Bible Online

Job 15 - Papantla Totonac bible

Job 15

¹E ora ei Elifaz e temanita a kontesta:

²"Un homber sabi lo kontesta ku konosementu bano, i yena su barika ku bientu di pariba?

³Lo e rasona ku palabra inutil, of ku argumento ku no ta di ningun probecho?

⁴Di berdat, bo ta pone temor un banda, i ta stroba meditashon dilanti di Dios.

⁵Pasobra bo inikidat ta pone sorto di palabranan asina den bo boka, i bo ta skohe e lenguahe di hende astuto.

⁶Bo mes boka ta kondenabo, i no ami; i bo mes lepnan ta testifika kontra bo.

⁷"Ta abo ta e prome hende ku a nase? Of bo a wordu traha prome ku e serunan?

⁸Bo ta tende e konseho sekreto di Dios, i ta limita sabiduria pa bo mes?

⁹Kiko abo sa ku nos no sa? Kiko abo ta komprende ku nos no ta komprende?

¹⁰Tantu esun ku kabei blanku komo e ansiano ta meimei di nos, muchu mas bieu ku bo tata.

¹¹Ta muchu poko e konsolashonnan di Dios ta pa bo, i e palabra ku a wordu papia ku bo ku karino?

¹²Pakiko bo kurason ta lastrabo bai kune? I pakiko bo wowonan ta spat kandela,

¹³ku bo ta bira bo spiritu kontra Dios, i ta permit! sorto di palabranan asina sali for di bo boka?

¹⁴"Kiko hende ta, ku e mester ta puru, of esun ku a nase di muhe, ku e mester ta hustu?

¹⁵Mira, E no ta pone konfiansa den Su santunan, i e shelunan no ta puru den Su bista;

¹⁶kuantu menos un hende ku ta abominabel i korumpi, hende ku ta bebe inikidat manera awa!

¹⁷"Lo mi kontabo, skuchami; i loke mi a mira, esei lo mi deklara tambe;

¹⁸loke hombernan sabi a konta, sin skonde nada ku nan a risibi for di nan tatanan,

¹⁹na kendenan so e tera a wordu duna, i ningun stranhero no a pasa meimei di nan.

²⁰E homber malbado ta trose di dolo tur su dianan, i e ananan ku ta warda pa e opresor ta konta.

²¹Zonidunan di teror ta den su orea, mientras ku e ta na pas e destruido ta bin riba dje.

²²E no ta kere ku e lo bolbe for di skuridat, i e ta destina pa spada.

²³E ta kana ront ta buska kuminda, i ta puntra: 'Unda e ta?' E sa ku dia di skuridat ta serka.

²⁴Aflikshon i angustia ta teroris'e; nan ta podera di dje manera un rei kla pa ataka,

²⁵pasobra el a saka su man kontra Dios, i ta komporta su mes ku arogansia kontra e Todopoderoso.

²⁶Ku arogansia e ta kore bai kontra djé ku su eskudo grandi i pisa.

²⁷"Pasobra el a tapa su kara ku vet, i a hasi su hepnan bira pisa di karni.

²⁸I el a biba den statnan desola, den kasnan kaminda ningun hende no kier a biba, ku ta destina pa bira ruina.

²⁹E lo no bira riku, ni su rikesa lo no dura, i su mainshi lo no dobla te na suela.

³⁰E lo no skapa for di skuridat; e flam lo seka su spreitnan, i pa medio di e rosea di e boka di Dios e lo bai.

³¹No lagu'e konfia den banidat, ganando su mes, pasobra banidat lo ta su rekompensa.

³²Esei lo wordu kumpli prome ku su tempu, i su rama di palma lo no ta berde.

³³Manera mata di wendruif e ta laga su wendruif berde kai abou, i manera palu di oleifi e ta tira su flor abou.

³⁴Pasobra e kompania di hende sin Dios ta infertil, i kandela ta kaba ku e tentnan di e hende korupto.

³⁵Nan ta konsebi perversidat i ta pari inikidat, i nan barika ta prepara engano."