Read Papantla Totonac Job 16 Bible Online

Job 16 - Papantla Totonac bible

Job 16

¹E ora ei Job a kontesta:

²"Mi a tende hopi kos asina; boso tur ta konsolado miserabel.

³No tin limite na palabra bano? Of kiko ta molestiabo ku bo ta kontesta?

⁴Mi tambe por a papia manera boso, si mi tabata na boso luga. Mi por a kompone palabranan kontra boso, i sakudi mi kabes pa boso.

⁵Mi por a fortalese boso ku mi boka, i e konsolashon di mi lepnan por a kalma boso dolo.

⁶"Si mi papia, mi dolo no ta bira menos, i si mi keda ketu, ki alivio esei lo ta pa mi?

⁷Ma awor El a lagami morto kansa; Bo a hasi tur e hendenan di mi kas keda desola.

⁸I Bo a yenami ku ploi, esei a bira un testigu kontra mi; i mi flakesa ta lanta kontra mi, e ta testigua den mi kara.

⁹Su rabia a sker mi i a persiguimi, El a krak Su djente kontra mi; mi atversario ta wak mi ku mal wowo.

¹⁰Nan a habri nan boka hanchu kontra mi, ku menospresio nan a dal mi na mi band'i kara; nan tur a basha bin kontra mi.

¹¹Dios ta entregami na malechornan, i ta tirami den man di e malbadonan.

¹²Mi tabata trankil, ma El a destrosami, i El a garami na mi nek i a sakudimi kibrami na pida-pida; tambe El a ponemi komo Su mekpunt pa E tira riba mi.

¹³Su flechanan ta rondonami. Sin miserikordia E ta traspasa mi rinonnan; E ta basha mi hal riba suela.

¹⁴E ta kibrami ku sla riba sla; E ta kore bin riba mi manera un guerero.

¹⁵"Mi a kose pana-di-saku na mi kurpa, i a hinka mi kachu den tera.

¹⁶Mi kara ta kora di yora, i skuridat profundo ta riba mi klepnan di wowo,

¹⁷maske no tin violensia den mi mannan, i mi orashon ta puru.

¹⁸"O tera, no tapa mi sanger, i no laga mi sklamashon hana ni un luga di sosiegu.

¹⁹Awor aki mes, mira, mi testigu ta den shelu, i mi abogado ta den e halturanan.

²⁰Mi amigunan ta esnan ku ta hasi bofon di mi; mi wowo ta drama lagrima dilanti di Dios.

²¹Mara un hende por a roga na Dios, manera un hende ta roga pa su prohimo!

²²"Pasobra ora poko ana a pasa, lo mi bai e kaminda for di unda lo mi no bolbe mas.