Read Papantla Totonac Job 18 Bible Online

Job 18 - Papantla Totonac bible

Job 18

¹E ora ei Bildad e suhita a kontesta:

²"Kuantu tempu mas lo bo rondia palabra? Sea rasonabel, i e ora ei nos por papia.

³Pakiko nos ta wordu mira komo bestia, i konsidera bobo den bo bista?

⁴Abo ku ta sker bo mes den bo rabia-- pa bo motibu tera mester wordu bandona, of e baranka kita for di su luga?

⁵"Di berdat, e lus di e malbado ta paga, i e flam di su kandela no ta duna klaridat.

⁶E lus den su tent a bira skur, i su lampi banda di dje ta paga.

⁷Su pasonan vigoroso a debilita, i su mes triki ta tir'e abou.

⁸Pasobra su mes pianan ta tir'e den e reda, i e ta trapa den e knopwerk.

⁹Un klem ta gar'e na su hilchi, i un trampa ta dal sera kune aden.

¹⁰Un laso ta skondi p'e den tera, i tin un trampa p'e riba kaminda.

¹¹Na tur banda terornan ta spant'e, i ta yag e na kada paso.

¹²Su forsa a kaba pa kousa di hamber, i kalamidat ta para kla banda di dje.

¹³Su kueru ta keda destrosa dor di enfermedat; e primogenito di morto ta devora miembronan di su kurpa.

¹⁴E ta wordu ranka for di e siguridat di su tent, i nan ta pon'e marcha dilanti di e rei di terornan.

¹⁵Nada di loke e tin den su tent no ta di dje; swafel ta wordu plama riba su luga di biba.

¹⁶Abou su raisnan a seka, i ariba su taki ta korta kita afo.

¹⁷Rekuerdo di dje ta perese for di tera, i e no tin nomber riba kaya.

¹⁸E ta wordu pusha for di lus den skuridat, i saka for di mundu.

¹⁹E no tin ni desendiente ni posteridat entre su pueblo, ni ningun sobrebibiente na e luga, kaminda e tabata biba.

²⁰Esnan di oksidente ta keda tur babuka di su destino, i esnan di oriente ta keda yen di horor.

²¹Siguramente asina e luganan di biba di e malbado ta, i esaki ta e luga di esun ku no konose Dios."