Read Papantla Totonac Job 19 Bible Online

Job 19 - Papantla Totonac bible

Job 19

¹E ora ei Job a kontesta:

²"Kuantu tempu mas boso lo tormentami, i kibrami na pida-pida ku palabra?

³Ya ta dies biaha kaba ku boso a insultami; boso no tin berguensa di tratami na manera inhustu.

⁴Ounke di berdat mi a komete eror, mi eror ta keda mi asunto.

⁵Si di berdat boso kier halsa boso mes kontra mi, i dunami prueba di mi reproche,

⁶sabi anto ku Dios a tratami na manera inhustu, i a sera Su reda ront di mi.

⁷"Ata, mi ta grita: 'Violensia!' ma mi no ta hana kontesta; mi ta grita pa yudansa, ma no tin hustisia.

⁸El a sera mi kaminda ku muraya, asina ku mi no por pasa, i El a pone skuridat den mi berehanan.

⁹El a ranka mi onor kita for di mi, i a kita e korona for di riba mi kabes.

¹⁰E ta kibrami na tur banda, i mi no t'ei mas; i mi speransa El a ranka manera ta ranka un palu ku rais ku tur.

¹¹Tambe El a laga Su rabia sende kontra mi, i a konsiderami komo Su enemigu.

¹²Su trupanan ta bin huntu, i ta traha nan baluarte kontra mi, i ta pone nan kampamentu ront di mi tent.

¹³"El a aleha mi rumannan leu for di mi, i mi konosinan a bira kompletamente strano pa mi.

¹⁴Mi famianan a faya, i mi amigunan intimo a lubidami.

¹⁵Esnan ku ta biba den mi kas i mi sirbientenan ta konsiderami komo un hende strano. Mi ta un stranhero den nan bista.

¹⁶Mi ta yama mi sirbido, ma e no ta kontesta; mi mester rogu'e ku mi boka.

¹⁷Mi esposa tin tegi di mi rosea, i mi mes rumannan tin asko di mi.

¹⁸Asta mucha chikitu ta despresiami; ora mi lanta para, nan ta papia kontra mi.

¹⁹Tur mi amigunan intimo ta aboresemi, i esnan ku mi ta stima a bira kontra mi.

²⁰Mi wesunan ta pega na mi kueru i na mi karni, solamente mi karn'i djente a keda.

²¹"Tene duele di mi, tene duele di mi, O boso, mi amigunan, pasobra e man di Dios a dal mi.

²²Pakiko boso ta persiguimi manera Dios ta hasi, i no ta keda satisfecho ku mi karni?

²³"Mara mi palabranan por a wordu skirbi! Mara nan por a wordu skirbi den un buki!

²⁴Ku nan por a wordu graba ku pen di heru i chumbu den baranka pa semper!

²⁵Pasobra mi sa ku mi Redentor ta biba, i ku na final E lo para riba tera.

²⁶I despues ku mi kueru keda destrui, mi sa esaki, ku den mi karni lo mi mira Dios,

²⁷Kende ami mes lo mira, i mi mes wowo lo mira i ningun otro hende. Mi kurason ta anhela den mi.

²⁸"Si boso bisa: 'Kon nos lo persiguie?' I 'Ki preteksto pa un kaso nos por hana kontra dje?'

²⁹Anto boso mes tene miedu di e spada, pasobra furia ta trese e kastigu di spada, pa boso por sa ku tin huisio."