Read Papantla Totonac Job 2 Bible Online

Job 2 - Papantla Totonac bible

Job 2

¹A yega un otro dia ku e yu hombernan di Dios a bin pa presenta nan mes dilanti di SENOR, i Satanas tambe a bin den nan pa presenta su mes dilanti di SENOR.

²I SENOR a bisa Satanas: "For di unda bo ta bin?" I Satanas a kontesta SENOR i a bisa: "For di bai-bin riba tera i di kana pariba-pabou den dje."

³I SENOR a bisa Satanas: "Bo a konsidera Mi sirbido Job? Pasobra no tin ningun hende manera e riba tera, un homber perfekto i rekto, ku ta teme Dios i ku ta aparta su mes for di maldat. I ainda e ta mantene su integridat, maske ku bo a poneMi kontra dje, pa ruin'e sin motibu."

⁴I Satanas a kontesta SENOR i a bisa: "Kueru pa kueru! Si, tur loke un hende tin e lo duna pa su bida.

⁵Ma saka Bo man awor i mishi ku su wesu i ku su karni; e lo maldishonaBo den Bo kara."

⁶Asina SENOR a bisa Satanas: "Mira, e ta den bo poder; solamente, spar su bida."

⁷E ora ei Satanas a sali bai for di e presensia di SENOR, i a suta Job ku blufein ku ta hasi masha dolo, for di su plant'i pia te na su korona di kabes.

⁸I el a kohe un pida di wea di klei kibra pa raspa su kurpa kune, mientras ku e tabata sinta den shinishi.

⁹E ora ei su esposa a bis'e: "Ainda bo ta mantene bo integridat? Maldishona Dios i muri!"

¹⁰Ma Job a bis'e: "Bo ta papia manera un di e muhenan bobo ta papia. Akaso nos tin ku asepta loke ta bon for di Dios i no asepta atversidat?" Den tur esaki Job no a peka ku su lepnan.

¹¹Awor ora e tres amigunan di Job a tende di henter e atversidat aki ku a pasa kune, kada un di nan a bin for di su mes luga: Elifaz e temanita, Bildad e suhita, i Sofar e naamatita; i nan a palabra ku otro pa nan bin kondoler Job i konsol'e.

¹²I ora nan a hisa kara wak e djaleu i no a rekonos'e, nan a grita yora. Anto kada un di nan a sker su pananan, i nan a tira tera den laira lagu'e kai riba nan kabes.

¹³E ora ei nan a sinta abou na suela huntu kune pa shete dia i shete anochi, sin ku ningun di nan a papia un palabra kune, pasobra nan a mira ku su dolo tabata masha pisa.