Read Papantla Totonac Job 20 Bible Online

Job 20 - Papantla Totonac bible

Job 20

¹E ora ei Zofar e naamatita a kontesta:

²"Pesei mi pensamentunan preokupa ta hasimi kontesta, pa motibu di e inkietut ku tin den mi.

³Mi a skucha e reprendementu ku ta insultami, i e spiritu di mi komprendementu ta hasimi kontesta.

⁴"Bo no sa esaki for di prome aya, desde ku hende a wordu poni riba mundu,

⁵ku e triunfo di e malbado ta kortiku, i e alegria di e hende sin Dios ta pa un momento so?

⁶Maske su orguyo yega te den e shelunan, i su kabes ta mishi ku e nubianan,

⁷e ta perese pa semper meskos ku su sushi; esnan ku a mir'e lo puntra: 'Unda e ta?'

⁸E ta bula bai manera un sono, i nan no por han'e; manera un vishon di anochi nan ta kore kune.

⁹E wowo ku tabata mir'e no ta mir'e mas, i su luga no ta mir'e mas.

¹⁰Su yunan ta buska fabor serka e pobernan, i su mannan ta debolbe su rikesa.

¹¹Su wesunan ta yen di e vigor di su hubentut, ma e ta keda huntu kune, drum! abou den stof.

¹²"Maske maldat ta dushi den su boka, i e ta skond'e bou di su lenga,

¹³maske e ta ward'e i no kier lagu'e bai, ma ta ten'e den su boka,

¹⁴tog e kuminda den su stoma ta kambia bira veneno di kobra den dje.

¹⁵E ta guli rikesanan, ma lo saka nan bek; Dios lo saka nan for di su barika.

¹⁶E ta chupa veneno di kobra; lenga di vibora ta mat'e.

¹⁷E no ta mira e koridanan di awa, e riunan di miel i manteka di lechi.

¹⁸E ta debolbe loke el a traha duru p'e, i no por gulie; pa loke ta e rikesanan di su negoshi, e no por ni gosa di nan.

¹⁹Pasobra el a oprimi i a bandona e pobernan; ku violensia el a tuma un kas ku e no a traha.

²⁰"Pasobra e no tabatin trankilidat den su kurason, e no ta keda ku nada di loke e ta desea.

²¹No ta keda nada pa e devora; pesei su prosperidat no ta dura.

²²Den tur su abundansia e lo pasa nesesidat; man di tur esnan ku ta sufri lo bin kontra dje.

²³Ora ku e yena su barika, Dios lo manda Su rabia furioso riba dje, i lo laga esei yobe riba dje mientras ku e ta kome.

²⁴E por hui pa e arma di heru, ma e bog di brons lo traspas'e.

²⁵E ta sak'e for di su lomba, e punta ku ta lombra e ta saka for di su nir. Teror ta podera di dje,

²⁶skuridat kompleto ta wordu reserva pa su tesoronan, i kandela ku hende no a waya lo destruie; esei lo kaba ku e sobrebibiente den su tent.

²⁷E shelunan lo revela su inikidat, i tera lo lanta kontra dje.

²⁸Loke el a akumula den su kas lo bai lagu'e; su biennan lo kaba na nada den e dia di Su rabia.

²⁹Esaki ta e porshon di Dios pa e homber malbado, e erensia ku Dios a apunta p'e."