Read Papantla Totonac Job 21 Bible Online

Job 21 - Papantla Totonac bible

Job 21

¹E ora ei Job a kontesta:

²"Skucha mi diskurso ku atenshon, i laga esaki ta boso konsuelo.

³Tene pasenshi ku mi, pa mi papia; i despues ku mi kaba di papia, boso por hasi bofon.

⁴"Akaso mi keho ta kontra hende? I pakiko lo mi no bira impasiente?

⁵Wak mi, i keda asombra, i pone man riba boka.

⁶Asta ora mi korda, mi ta keda spanta, i temblamentu ta podera di mi.

⁷Pakiko e malbadonan ta sigui biba i bira bieu, si, bira masha poderoso mes?

⁸Nan ta mira nan desendientenan stablesi ront di nan, i nan yunan dilanti di nan wowo.

⁹Nan kasnan ta sigur i liber di temor; e bara di Dios tampoko no ta riba nan.

¹⁰Nan toronan ta engendra sin faya; nan baka ta werp i no ta perde yu.

¹¹Nan ta laga nan chikitunan sali bai manera un tou di karne, i nan yunan ta bula ront.

¹²Nan ta kanta ku tamburein i arpa, i ta regosiha riba tono di fluit.

¹³Nan ta pasa nan dianan den prosperidat, i den un momento nan ta baha bai den Seol.

¹⁴I nan ta bisa Dios: 'Bai for di nos! Nos no ta ni desea e konosementu di Bo kamindanan.

¹⁵Ta ken e Todopoderoso ta, ku nos mester sirbié, i kiko nos ta gana, si nos hasi orashon na djé?'

¹⁶Ata, nan prosperidat no ta den nan man; e konseho di e malbado ta leu for di mi.

¹⁷"Kuantu biaha lampi di e malbado ta wordu paga? I kuantu biaha kalamidat ta bin riba nan? Dios ta reparti destrukshon den Su rabia?

¹⁸Nan ta manera yerba seku dilanti di bientu, i manera bagas ku tempestat ta hiba.

¹⁹Nan ta bisa: 'Dios ta warda inikidat di un hende pa su yunan.' Laga Dios paga e hende mes, pa e komprende.

²⁰Laga su mes wowo mira su destrukshon, i lagu'e bebe di e furia di e Todopoderoso.

²¹Pasobra kiko ta import'e su kas despues di su morto, ora ku e kantidat di su lunanan wordu korta kita afo?

²²"Un hende por sina Dios konosementu, siendo ku ta E ta huzga esunnan di mas haltu?

²³Un hende ta muri yen di vigor, siendo henteramente na pas i trankil;

²⁴su kustianan ta yen di vet, i e tuti di su wesunan ta keda fresku asina,

²⁵mientras ku otro ta muri ku alma amarga, sin ku nunka el a purba algu bon.

²⁶Huntu nan ta drumi den stof, i bichi ta tapa nan.

²⁷"Mira, mi konose boso pensamentunan, i e komplotnan ku kualnan boso kier a hasimi dano.

²⁸Pasobra boso ta puntra: 'Unda kas di e hende nobel ta keda? I unda e tent ta, e luganan di biba di e malbadonan?'

²⁹Boso no a puntra esnan ku ta pasa riba kaminda? I boso no a asepta nan testimonio?

³⁰Pasobra e malbado ta reserva pa e dia di kalamidat; nan lo wordu saka afo riba e dia di rabia.

³¹Ken lo konfront'e ku su akshonnan, i ken lo pagu'e pa loke el a hasi?

³²Mientras ku e ta wordu hiba na graf, hende lo tene warda na su tumba.

³³E klompinan di tera di e vaye lo tap'e dushi asina; ademas, tur hende lo sigui su tras, mientras ku un kantidat ku no por wordu konta ta bai su dilanti.

³⁴"Kon anto boso por konsolami ku palabranan bano, siendo ku boso kontestanan ta keda yen di falsedat?"