Read Papantla Totonac Job 22 Bible Online

Job 22 - Papantla Totonac bible

Job 22

¹E ora ei Elifaz e temanita a kontesta:

²"Un hende yen di vigor por ta util pa Dios? Of un hende sabi por ta util pa su mes?

³Ki probecho esei lo duna e Todopoderoso, ku bo ta hustu, of ki ganashi, ku bo ta hasi bo kamindanan perfekto?

⁴"Ta pa motibu di bo temor p'E ku E ta reprendebo, ku E ta ehekuta huisio kontra bo?

⁵No t'asina ku bo maldat ta grandi i bo inikidatnan ta sin fin?

⁶Pasobra sin motibu bo a eksigi garantia for di bo rumannan, i a kita hende su pana, laga nan sunu.

⁷Esun ku ta kansa bo no a duna awa pa bebe, i esun ku tin hamber bo a nenga pan.

⁸Ma tera ta pertenese na e homber poderoso, i e homber onorabel ta biba riba dje.

⁹Bo a manda biudanan bai man bashi, i forsa di e werfanonan a wordu kibra.

¹⁰Pesei tin trampanan tur ront di bo, i spantu repentino ta terorisabo,

¹¹of skuridat, asina ku bo no por mira, i un abundansia di awa ta tapabo.

¹²"Dios no ta den e haltura di shelu? Wak tambe e streanan leu aya, kon haltu nan ta!

¹³I bo ta puntra: 'Kiko Dios sa? E por huzga dor di skuridat profundo?

¹⁴Nubianan diki ta tap'E, asina ku E no por mira; i E ta kana riba e sirkulo di shelu.'

¹⁵Bo kier sigui e kaminda antiguo ku hombernan malbado a kana riba,

¹⁶kendenan a wordu ranka kita afo prome ku nan tempu, kende nan fundeshi a wordu laba hiba dor di un riu?

¹⁷Nan a bisa Dios: 'Bai for di nos!' I 'Kiko e Todopoderoso por hasi nan?'

¹⁸Sinembargo, El a yena nan kasnan ku kosnan bon; ma konseho di e malbado ta leu for di mi.

¹⁹"E hustunan ta mira esei i ta keda kontentu, i e inosente ta hasi bofon di nan,

²⁰bisando: 'Di berdat, nos atversarionan ta korta kita afo, i kandela a kaba ku nan abundansia.'

²¹"Entregabo awor i keda na pas kuné; dor di esei bondat lo bin pa bo.

²²Pa fabor, asepta instrukshon for di Su boka, i warda Su palabranan den bo kurason.

²³Si bo bolbe serka e Todopoderoso, lo bo wordu edifika; si bo hala inhustisia leu for di bo tent,

²⁴i pone bo oro den e stof, i e oro di Ofir meimei di e piedranan di e roinan,

²⁵e ora ei e Todopoderoso lo ta bo oro i plata presioso pa bo.

²⁶Pasobra e ora ei lo bo tin delisia den e Todopoderoso, i lo hisa bo kara na Dios.

²⁷Lo bo hasi orashon na djé, i E lo skuchabo, i lo bo kumpli ku bo promesanan.

²⁸Tambe lo bo deklara algu, i esei lo wordu stablesi pa bo, i lus lo briya riba bo kamindanan.

²⁹Ora bo ta abati, lo bo papia ku konfiansa, i e persona umilde E lo salba.

³⁰E lo libra esun ku no ta inosente, i e lo wordu libra pa medio di e limpiesa di bo mannan."