Read Papantla Totonac Job 24 Bible Online

Job 24 - Papantla Totonac bible

Job 24

¹"Pakiko e Todopoderoso no ta stipula tempu pa huisio? I pakiko esnan ku konos'E no ta mira Su dianan?

²Tin hende ku ta kita e markanan di tereno; nan ta horta i devora tounan di karne.

³Nan ta bai ku e burikunan di e werfanonan; nan ta tuma buey di e biuda komo garantia.

⁴Nan ta pusha esnan den nesesidat for di kaminda; i ta forsa e pobernan di e tera pa skonde huntu.

⁵Mira, manera buriku di mondi den desierto nan ta sali bai nan trabou, buskando kuminda ku diligensia; e desierto ta produsi kuminda pa nan i pa nan yunan.

⁶Nan ta korta yerba pa nan bestianan den kunuku, i nan ta piki wendruif ku ta ked'atras den kunuku di e malbado.

⁷Nan ta pasa nochi sunu, sin pana, i nan no tin nada pa tapa kontra friu.

⁸Nan ta tur muha di e awaseru di e serunan haltu, i nan ta brasa baranka pa falta di luga di skonde.

⁹Otronan ta ranka e werfano for di pechu, i for di hende pober nan ta eksigi garantia.

¹⁰Nan ta laga nan kana ront sunu, sin pana. I nan ta kita e bohinan for di esnan ku tin hamber.

¹¹Paden di nan murayanan nan ta produsi zeta; nan ta trapa druif den e bakinan-di-pers-wendruif, i tog nan tin set.

¹²For di e stat hendenan ta keha, i e almanan di esnan herida ta sklama; sinembargo, Dios no ta hasi kaso di lokura.

¹³"Tin esnan ku ta rebeldia kontra e lus; nan no konose su kamindanan, ni ta keda den su berehanan.

¹⁴E matado ta lanta ora dia ta habri; e ta mata e pobernan i esnan den nesesidat, i anochi e ta meskos ku un ladron.

¹⁵I wowo di e kibrado di matrimonio ta warda te ora kuminsa bira skur, i ta bisa: 'Ningun wowo lo mirami.' I e ta disfrasa su kara.

¹⁶Den skur nan ta kibra drenta den kasnan, den dia nan ta sera nan mes paden; nan no konose lus.

¹⁷Mainta ta meskos ku skuridat profundo p'e, pasobra e ta kustumbra ku e terornan di skuridat profundo.

¹⁸"Nan ta insignifikante riba e superfisio di awa; nan porshon ta keda maldishona riba tera. Nan no ta bira den direkshon di e kunukunan di wendruif.

¹⁹Sekura i kalor ta kaba ku e awanan di sneu, asina tambe Seol ta kaba ku esnan ku a peka.

²⁰Un mama lo lubid'e; bichi ta fiesta kune, te ku ningun hende no ta kord'e mas. I maldat lo wordu kibra manera un palu.

²¹E ta trata e muhe steril na manera inhustu, i no ta hasi bon pa e biuda.

²²Ma pa medio di Su poder Dios ta lastra e poderoso bai kune; e ta lanta bek, ma ningun hende no tin siguransa di bida.

²³E ta duna nan siguridat i nan ta wordu sosteni, i Su wowo ta riba nan kamindanan.

²⁴Pa poko tempu nan ta halsa, despues nan no t'ei mas; ademas, nan ta wordu rebaha, i manera tur kos nan ta wordu korta kita for di kaminda; i nan ta keda korta manera tapushi di mainshi.

²⁵"Awor si no ta asina, ken por proba ku mi ta un ganado, i mustra ku mi palabranan no bal nada?"