Read Papantla Totonac Job 26 Bible Online

Job 26 - Papantla Totonac bible

Job 26

¹E ora ei Job a kontesta:

²"Ki yudansa bo ta pa esun ku ta debil! Kon bo a salba e brasa ku ta sin forsa!

³Ki konseho bo a duna esun ku no tin sabiduria! Ki konosementu sano bo a duna na abundansia!

⁴Na ken bo a dirigi palabra? I spiritu di ken a papia dor di bo boka?

⁵"E mortonan ta tembla bou di e awanan i nan habitantenan.

⁶Seol ta sunu Su dilanti, i Abadon no tin ko'i tapa.

⁷E ta ekstende e parti nort riba espasio bashi, i ta kologa tera riba nada.

⁸E ta lora e awanan den Su nubianan; tog e nubia no ta rementa bou di nan peso.

⁹E ta tapa kara di luna yen, i ta ekstende Su nubia riba dje.

¹⁰El a traha un sirkulo riba superfisio di e awanan, un frontera entre lus i skuridat.

¹¹E pilaman di shelu ta tembla, i ta keda asombra pa motibu di Su reprendementu.

¹²El a kalma laman ku Su poder, i pa medio di Su komprendementu El a destrosa Rahab.

¹³Pa medio di Su rosea El a dorna e shelunan; Su man a traspasa e kolebra ku ta hui.

¹⁴Mira, esakinan ta djis un parti minimal di Su obranan; i ta un palabra suave asina nos ta tende for di djé! Ma ken por komprende Su strena poderoso?"