Read Papantla Totonac Job 27 Bible Online

Job 27 - Papantla Totonac bible

Job 27

¹E ora ei Job a sigui su diskurso i a bisa:

²"Manera Dios ta biba, Kende a kita mi derecho, i e Todopoderoso, Kende a amarga mi alma,

³pasobra tanten ku tin bida den mi, i e rosea di Dios ta den mi nanishi,

⁴mi lepnan siguramente lo no papia inhustisia, ni mi lenga lo no ekspresa engano.

⁵Nunka di mi bida lo mi bisa ku boso tin rason; te na mi morto lo mi no bandona mi integridat.

⁶Mi ta tene mi hustisia duru i no ta lagu'e bai. Mi kurason no ta reprocha ni un di mi dianan.

⁷"Laga mi enemigu ta manera e malbado, i esun ku lanta kontra mi, manera e inhustu.

⁸Pasobra kiko ta e speransa di e hende sin Dios, dia ku e wordu korta kita afo, dia ku Dios eksigi su alma?

⁹Akaso Dios lo skucha su sklamashon dia ku aflikshon bin riba dje?

¹⁰Lo e tin delisia den e Todopoderoso? Lo e sklama na Dios tur ora?

¹¹"Lo mi sinabo tokante di e poder di Dios; loke e Todopoderoso tin plania lo mi no skonde.

¹²Ata, boso tur a mira esaki; pakiko anto boso ta papia banidat?

¹³"Esaki ta e porshon for di Dios pa un homber malbado, i e erensia ku e opresornan ta risibi for di e Todopoderoso.

¹⁴Maske su yunan ta hopi, ta pa spada nan ta destina; i nunka su desendientenan lo no tin sufisiente pan.

¹⁵Esnan di dje ku sobrebibi lo wordu dera pa motibu di e plaga, i nan biudanan lo no por yora.

¹⁶Maske e montona plata manera stof i montona pana manera klei,

¹⁷e lo prepar'e, ma e hustu lo bistie, i e inosente lo parti e plata.

¹⁸El a traha su kas manera kas di arana, of manera un kabana ku e wardado di kunuku a traha.

¹⁹Riku e ta drumi, ma pa delaster biaha; e ta habri su wowo, i su rikesa no t'ei mas.

²⁰Terornan ta podera di dje manera un diluvio; anochi tempestat ta hort'e bai kune.

²¹Bientu di pariba ta hib'e, i e ta disparse; e ta supl'e kit'e for di su luga.

²²Pasobra e ta dal kontra dje sin miserikordia; siguramente e lo purba hui for di su poder.

²³Hende lo bati man kontra dje i lo fluit kit'e for di su luga.