Read Papantla Totonac Job 28 Bible Online

Job 28 - Papantla Totonac bible

Job 28

¹"Siguramente tin un mina kaminda ta hana plata, i un luga kaminda nan ta refina oro.

²Heru ta wordu saka for di den tera, i for di baranka hende ta dirti koper.

³Hende ta pone un fin na skuridat, i ta buska te na e limite di mas leu e piedra ku ta den skuridat i den e sombra di morto.

⁴E ta koba un mina leu for di kaminda hende ta biba, na luganan ku pia di hende a lubida; nan ta kologa i ta zwai bai bin leu for di hende.

⁵Tera, for di dje ta sali pan, ma abou e ta wordu reboltia manera kandela.

⁶Su barankanan ta luga di hana safiro, i su stof ta kontene oro.

⁷E bereha ei ningun parha di rapina no konose, ni wowo di falki no a mir'e nunka.

⁸Bestia soberbe no a kana riba dje, ni leon feros no a pasa riba dje.

⁹E ta pone su man riba piedra duru; e ta bolter e serunan laga nan raisnan keda bisto.

¹⁰E ta korta baranka habri kanal, i su wowo ta mira tur sorto di kos presioso.

¹¹E ta traha dam pa e koridanan di awa pa nan no kore mas, i loke ta skondi e ta saka trese na kla.

¹²"Ma unda sabiduria por wordu hana? I na unda e luga di komprendementu ta?

¹³Hende no konose su balor; tampoko e no ta wordu hana den e tera di e bibunan.

¹⁴Profundidat ta bisa: 'E no ta den mi', i laman ta bisa: 'E no ta serka mi.'

¹⁵E no por wordu kumpra ku oro, ni plata no por wordu pisa komo su preis.

¹⁶E no por wordu balora na preis di oro di Ofir, di piedranan presioso di oneks of safiro.

¹⁷Ni oro ni kristal no por igual'e, ni e no por wordu kambia pa artikulonan di oro fini.

¹⁸Koral i kristal no mester wordu menshona mes; i e preis di sabiduria ta mas haltu ku esun di perla.

¹⁹E topasio di Etiopia no por igual'e, ni e no por wordu balora na preis di oro puru.

²⁰"For di unda sabiduria ta bin anto? I na unda e luga di komprendementu ta?

²¹Asina e ta skondi pa wowo di tur loke ta biba, i skondi pa e parhanan di shelu.

²²Destrukshon i Morto ta bisa: 'Nos a tende un rumor di esaki ku nos orea.'

²³Dios ta komprende su kaminda, i E konose su luga.

²⁴Pasobra E ta wak te na e finnan di mundu, i ta mira tur kos bou di e shelunan.

²⁵Ora ku El a duna bientu su peso i a stipula midi di e awanan,

²⁶ora ku El a traha un lei pa awaseru, i un kaminda pa e rayonan di lamper,

²⁷e ora ei El a mira esaki i a deklar'e; El a stables'e i tambe a skudrin'e.

²⁸I na hende El a bisa: 'Mira, e temor di SENOR, ta esei ta sabiduria; i pa aparta for di maldat ta komprendementu.'"