Read Papantla Totonac Job 29 Bible Online

Job 29 - Papantla Totonac bible

Job 29

¹Job a sigui su diskurso i a bisa:

²"Mara mi tabata manera mi tabata lunanan pasa, manera den e dianan ku Dios tabata kuidami;

³tempu ku Su lampi tabata briya riba mi kabes, i pa medio di Su lus mi tabata kana pasa dor di skuridat;

⁴manera mi tabata den e dianan di mi hubentut, tempu ku e amistat di Dios tabata riba mi tent;

⁵tempu ku e Todopoderoso tabata ku mi ainda, i mi yunan tabata ront di mi;

⁶tempu ku mi pasonan tabata bana den manteka, i e baranka tabata basha riunan di zeta pa mi!

⁷"Tempu ku mi tabata sali bai na e porta di stat, tempu ku mi tabata bai sinta na mi luga riba plenchi,

⁸e hobennan tabata mirami i tabata bai skonde, i e ansianonan tabata lanta para.

⁹E prensnan tabata stop di papia, i tabata pone man na boka;

¹⁰bos di e nobelnan tabata keda ketu, i nan lenga tabata pega na nan shel'i boka.

¹¹Pasobra ora orea tabata tende, e tabata yamami bendishona, i ora wowo tabata mira, e tabata duna testimonio di mi,

¹²pasobra mi tabata libra e pober ku tabata sklama pa yudansa, i e werfano ku no tabatin ningun hende pa yud'e.

¹³E bendishon di e homber muribundu a bin riba mi, i mi tabata hasi kurason di e biuda kanta di alegria.

¹⁴Mi tabata bisti mi mes ku hustisia, i esei tabata tapami; mi hustisia tabata manera un mantel i un tulban.

¹⁵Mi tabata wowo pa e siegu i pia pa e lam.

¹⁶Mi tabata un tata pa esnan den nesesidat, i mi tabata investiga kaso di hende deskonosi pa mi.

¹⁷I mi tabata kibra kachete di e malbado, i tabata ranka e proi for di meimei di su djentenan.

¹⁸"E ora ei mi a pensa: 'Lo mi muri den mi neishi, i lo mi multiplika mi dianan manera santu.

¹⁹Mi rais ta plama te yega na e awanan, i serena ta keda henter anochi riba mi taki.

²⁰Mi gloria semper ta nobo den mi, i mi bog ta wordu renoba den mi man.'

²¹"Nan tabata skuchami i tabata spera, i tabata keda ketu pa tende mi konseho.

²²Despues di mi palabranan nan no tabata papia mas, i mi palabranan tabata gotia riba nan.

²³I nan tabata spera riba mi manera riba awaseru, i tabata habri nan boka hanchu manera pa e ultimo awaseru di temporada.

²⁴Ora mi tabata hari ku nan, kasi nan no por a kere, i e lus di mi kara nan no por a kita.

²⁵Mi tabata skohe un kaminda pa nan i tabata sinta komo hefe, i tabata biba manera rei meimei di e trupanan, manera un hende ku tabata konsola esnan ku tabata yora.