Read Papantla Totonac Job 3 Bible Online

Job 3 - Papantla Totonac bible

Job 3

¹Despues Job a habri su boka i a maldishona e dia ku el a nase.

²I Job a bisa:

³"Laga e dia riba kual mi a nase perese, i e anochi ku a bisa: 'Un yu homber ta konsebi.'

⁴Laga e dia ei ta skuridat; laga Dios aya riba no perkura p'e, ni lus briya riba dje.

⁵Laga skuridat i sombra di morto podera di dje; laga un nubia reposa riba dje; laga e skuridat di e dia ei teroris'e.

⁶I e anochi ei, laga skuridat gar'e; no lagu'e wordu konta den e dianan di ana; no lagu'e ta den e kantidat di lunanan.

⁷Mira, laga e anochi ei ta steril; no laga ningun gritu di alegria resona den dje.

⁸Laga esnan ku ta maldishona dia, maldishon'e, esnan ku tin e abilidat pa spierta Leviatan.

⁹Laga su streanan di mainta bira skur; lagu'e spera lus, sin hana; tampoko no lagu'e mira e habrimentu di dia,

¹⁰pasobra e no a sera boka di matris di mi mama, ni a skonde miseria pa mi wowonan.

¹¹"Pakiko mi no a muri na ora di mi nasementu, sali for di barika di mi mama i perese?

¹²Pakiko e rudianan a risibimi, i pakiko e pechunan, pa mi bebe?

¹³Sino awor lo mi tabata sosega na pas; lo mi tabata drum! e ora ei, lo mi tabata sosega

¹⁴huntu ku reinan i konseheronan di e tera, ku a rekonstrui ruinanan pa nan mes;

¹⁵of huntu ku prensnan ku tabatin oro, ku tabata yena nan kasnan ku plata.

¹⁶Of dera manera un meskram, lo mi no tabat'ei, manera yuchi ku nunka a mira lus.

¹⁷Ayanan e malbadonan ta stop di molestia; i ayanan esnan kansa tin sosiegu.

¹⁸E prezonan ta sosega huntu; nan no ta tende bos di e kapatas.

¹⁹Chikitu i grandi ta ayanan, i e esklabu ta liber di su shon.

²⁰"Pakiko lus ta wordu duna na esun ku ta sufri, i bida na esun ku tin amargura di alma,

²¹ku ta desea morto, ma morto no ta bin, i ta koba busk'e mas ku tesoronan skondi;

²²ku ta alegra grandemente, i ta regosiha ora ku nan hana e graf?

²³Pakiko lus ta wordu duna na un homber, kende su kaminda ta skondi, i kende Dios a ensera na tur banda?

²⁴Pasobra asina mi mira mi kuminda, mi ta kuminsa suspira, i mi kehamentunan ta bash'afo manera awa.

²⁵Pasobra loke mi ta teme ta bin riba mi, i loke mi tin miedu di dje ta sosode ku mi.

²⁶Mi no tin pas, ni trankilidat, i mi no tin sosiegu, ma ta problema so ta bin."