Read Papantla Totonac Job 30 Bible Online

Job 30 - Papantla Totonac bible

Job 30

¹"Ma awor esnan ku ta mas hoben ku mi ta hasi bofon di mi, esnan ku nan tatanan mi no a konsidera digno pa pone nan huntu ku e kachonan di mi tou di karne.

²Di berdat, di kiko e forsa di nan mannan a sirbimi? Nan a perde nan vigor.

³Nan ta flaku-flaku pa motibu di nesesidat i hamber, kendenan ta kou tera seku anochi na luganan bandona i desola.

⁴Nan ta ranka malba for di den e matanan, i rais di mata di enebro ta nan kuminda.

⁵Nan ta wordu saka for di komunidat; hende ta grita nan manera ta grita ladron,

⁶asina ku nan ta biba den vayenan spantoso, den burakunan den tera i den e barankanan.

⁷Meimei di e matanan nan ta grita manera buriku; i bou di e matanan di sumpina nan ta bin huntu.

⁸Hende bobo, si, esnan sin nomber, nan a wordu suta saka for di e tera.

⁹"I awor mi a bira nan kantika di bofon, asta mi a bira un refran pa nan.

¹⁰Nan ta aboresemi i ta aleha nan mes for di mi, i nan no ta laga di skupi den mi kara.

¹¹Pasobra El a los lina di Su bog i a afligimi, nan a laga frena bai mi dilanti.

¹²Na mi man drechi e multitut bulgar ta lanta; nan ta pusha mi pianan un banda i ta lanta nan kamindanan di destrukshon kontra mi.

¹³Nan ta kibra mi kaminda, nan tin probecho di mi kalamidat, ningun hende no ta stroba nan.

¹⁴Manera dor di un kibra hanchu nan ta pasa, meimei di un tempestat nan ta lora bin.

¹⁵Teroman ta bin kontra mi, nan ta persigui mi onor manera bientu, i mi prosperidat a pasa bai manera un nubia.

¹⁶"I awor mi alma ta wordu drama paden di mi; dianan di aflikshon a garami.

¹⁷Anochi e ta traspasa mi wesunan den mi, i e dolonan ku ta komemi no ta tuma sosiegu.

¹⁸Pa medio di un forsa enorme mi pana ta keda tur trosi; e ta chokami manera e kol di mi bachi.

¹⁹El a tirami den lodo, i mi a bira manera stof i shinishi.

²⁰"Mi ta sklama na Bo pa yudansa, ma Bo no ta kontestami; mi ta lanta para i Bo no ta paga atenshon na mi.

²¹Bo a bira kruel pa mi; ku e poder di Bo man Bo ta persiguimi.

²²Bo ta hisami pone riba bientu i ta hasimi kore riba dje; i Bo ta hasimi disolve den un tempestat.

²³Pasobra mi sa ku lo Bo hibami na morto i na e kas destina pa tur ku ta biba.

²⁴"Ma un hende ku ta den un monton di ruina no ta ekstende su man, of den su desaster no ta sklama pa yudansa?

²⁵Mi no a yora pa esun ku su bida ta duru? Mi alma no tabatin duele di esun den nesesidat?

²⁶Ora mi tabata spera bon, malu a bin; ora mi tabata spera lus, skuridat a bin.

²⁷Mi ta kushi paden i no por sosega; dianan di aflikshon ta konfrontami.

²⁸Mi ta kana ront tur pretu, ma no di solo; mi ta lanta para den e asamblea i ta sklama pa ousilio.

²⁹Mi a bira ruman di chakal i kompanero di abestrus.

³⁰Mi kueru ta bira pretu i ta kita, i mi wesunan ta kima di keintura.

³¹Pesei muzik di mi arpa a bira yanto di rou, i mi fluit, bos di esnan ku ta yora.