Read Papantla Totonac Job 31 Bible Online

Job 31 - Papantla Totonac bible

Job 31

¹"Mi a sera un aliansa ku mi wowonan; kon anto mi por a wak un birgen?

²I kiko ta e porshon di Dios for di ariba, of e erensia di e Todopoderoso for di haltura?

³Esei no ta kalamidat pa e inhustu, i desaster pa esnan ku ta hasi inikidat?

⁴E no ta mira mi kamindanan i ta konta tur mi pasonan?

⁵"Si mi a anda ku falsedat, i mi pia a pura bai tras di engano,

⁶lagu'E pisami ku balansa eksakto, i laga Dios konose mi integridat.

⁷Si mi paso a desvia for di e kaminda, of mi kurason a sigui mi wowonan, of si algun mancha a pega na mi man

⁸laga ami planta i un otro kome, i laga mi kosecha wordu ranka ku rais ku tur.

⁹"Si mi kurason a wordu sedusi dor di un muhe, of si mi a lur na porta di mi bisina,

¹⁰laga mi esposa mula pa un otro, i laga otronan drumi kune.

¹¹Pasobra esei lo tabata maldat; ademas, e lo tabata inikidat kastigabel pa hues.

¹²Pasobra esei lo tabata un kandela ku ta kima te na destrukshon, i lo a destrui tur mi ganashi.

¹³"Si mi a despresia derecho di mi esklabu homber of esklabu muhe ora nan a lanta un keho kontra mi,

¹⁴kiko mi por hasi anto ora Dios lanta, i ora ku E yamami pa duna kuenta, kiko lo mi kontest'E?

¹⁵No ta Esun ku a trahami den barika a traha nan? I no ta e Mesun ta forma nos den barika?

¹⁶"Si mi a stroba e pober di hana su deseo, of a hasi wowo di e biuda faya,

¹⁷of a kome mi boka di kuminda mi so, i e werfano no a kome for di dje

¹⁸(ma for di mi hubentut el a lanta serka mi manera serka un tata, i for di infansia mi a gui'e),

¹⁹si mi a mira un hende perese pa falta di pana, of ku esun den nesesidat no tabatin ko'i tapa,

²⁰si su kurason no a bendishonami, i si e no a tene su kurpa kayente ku lana di mi karnenan,

²¹si mi a lanta mi man kontra e werfano, pasobra mi a mira ku mi tabatin yudansa den e porta di stat,

²²laga mi skouder sali for di su luga, i mi brasa wordu kibra na elebog.

²³Pasobra kalamidat for di Dios ta un teror pa mi, i pa motibu di Su mahestat mi no por hasi nada.

²⁴"Si mi a pone mi konfiansa den oro, i a yama oro fini mi konfiansa;

²⁵si mi a gaba, pasobra mi rikesa tabata grandi, i pasobra mi man a gana asina hopi;

²⁶si mi a opserva solo ora ku e tabata briya, of luna moviendo den splendor,

²⁷i mi kurason a wordu engana na sekreto, i mi man a tira un sunchi for di mi boka,

²⁸esaki tambe lo tabata un inikidat ku mester a wordu huzga, pasobra lo mi a nenga e Dios aya riba.

²⁹"Mi a regosiha den destrukshon di mi enemigu, of a sintimi gosa ora maldat a bin riba dje?

³⁰No, mi no a permiti mi boka peka dor di pidi un maldishon pa su bida.

³¹E hombernan di mi tent no a puntra: 'Ken por hana un hende ku no a yena su barika ku karni ku Job a provee'?

³²E stranhero no a pasa nochi pafo, pasobra mi a habri mi portanan pa e biahero.

³³Akaso mi a tapa mi transgreshonnan manera Adam, dor di skonde mi inikidat den mi bus,

³⁴pasobra mi tabata teme e gran multitut; i e menospresio di e famianan a terorisami, i mi a keda ketu i no a sali pafo?

³⁵"O ku mi tabatin un hende pa skuchami! Mira, ata mi firma aki; laga e Todopoderoso kontestami! I e akusashon ku mi kontrapartida a skirbi,

³⁶siguramente lo mi a kargu'e riba mi skouder; lo mi a mar'e manera un korona.

³⁷Lo mi a dun'E kuenta di tur mi pasonan; manera un prens lo mi a aserk'E.

³⁸"Si mi tera sklama kontra mi, i su hoyonan yora huntu;

³⁹si mi a kome su fruta sin paga, of a hasi su dononan perde nan bida,

⁴⁰laga mata di sumpina krese na luga di trigo, i yerba stinki na luga di puspas." E palabranan di Job a termina.