Read Papantla Totonac Job 37 Bible Online

Job 37 - Papantla Totonac bible

Job 37

¹"Pa esaki tambe mi kurason ta tembla, i ta bula for di su luga.

²Skucha atentamente na Su bos ku ta zona manera strena, i e zonidu duru ku ta sali for di Su boka.

³Bou di henter shelu E ta lagu'e los, i Su lamper te na e finnan di tera.

⁴Despues di esaki un bos ta ronka; E ta strena ku Su bos mahestuoso; i E no ta wanta e lampernan ora Su bos ta zona.

⁵Dios ta strena maraviyosamente ku Su bos; E ta hasi kosnan grandi ku nos no por komprende.

⁶Pasobra na sneu E ta bisa: 'Kai riba tera,' i na diluvio i awaseru: 'Sea fuerte.'

⁷E ta seya man di tur hende, pa tur hende konose Su obra.

⁸Anto e bestia ta bai den su luga di skonde, i ta keda den su kueba.

⁹For di suit ta bin tempestat, i for di nort frialdat.

¹⁰Dor di e rosea di Dios eis ta wordu traha, i superfisio di e awanan ta vris.

¹¹Tambe E ta karga e nubia diki ku humedat; e nubia di Su lamper E ta plama tur ront.

¹²I esaki ta kambia di direkshon i ta bira ront bou di Su guiansa, pa nan por hasi tur loke E ordena nan riba superfisio di e mundu habita.

¹³Sea pa korekshon, of pa Su mundu, of pa motibu di Su miserikordia, E ta hasie sosode.

¹⁴"Tende esaki, O Job, para ketu i konsidera e maraviyanan di Dios.

¹⁵Bo sa kon Dios ta stablese nan, i ta hasi e lamper di Su nubia briya?

¹⁶Bo sa tokante di e lagnan di e nubianan diki, e maraviyanan di Esun ku ta perfekto den konosementu,

¹⁷abo, kende su bistinan ta bira kayente, ora tera ta ketu pa motibu di bientu di suit?

¹⁸Huntu kuné bo por ekspande e shelunan, firme, manera un spil di metal basha?

¹⁹"Sina nos kiko nos mester bis'E; nos no por regla nos kaso pa motibu di skuridat.

²⁰Ta nesesario pa bis'E ku ami kier papia? Un hende lo pidi pa e wordu gull?

²¹I awor hende no ta mira e lus ku ta briya den e shelunan, ma bientu a pasa i a klaria nan.

²²For di nort ta sali splendor di oro; tur ront di Dios tin mahestat temibel.

²³E Todopoderoso--nos no por han'E; E ta ekselente den poder; i E lo no viola huisio ni hustisia abundante.

²⁴Pesei hende tin temor di djé; E no ta hasi kaso di ningun hende ku ta sabi den nan kurason."