Read Papantla Totonac Job 38 Bible Online

Job 38 - Papantla Totonac bible

Job 38

¹E ora ei SENOR a kontesta Job for di e warwaru i a bisa:

²"Ta ken esaki ta ku ta hasi konseho bira skur pa medio di palabranan sin konosementu?

³Awor faha bo hep manera homber, i Ami lo hasibo pregunta, i abo lo instruiMi!

⁴"Na unda bo tabata tempu ku Mi a pone fundeshi di mundu? BisaMi, si bo tin komprendementu.

⁵Ken a determina su midinan, ya ku bo sa esei? Of ken a ekstende e lina-di-midi riba dje?

⁶Riba kiko su fundeshinan a wordu wanta? Of ken a pone su piedra-di-skina,

⁷tempu ku e streanan di marduga tabata kanta huntu, i tur e yu hombernan di Dios tabata grita di alegria?

⁸"Of ken a sera e laman ku portanan, ora ku el a bash'afo i a sali for di matris;

⁹ora Mi a traha un bisti di nubia p'e, i a laga skuridat diki sirbi komo su pana di lombrishi,

¹⁰i Mi a stablese su limitenan, i Mi a pone un tranka i portanan,

¹¹i Mi a bisa: 'Te aki bo ta yega, ma no mas leu; i aki bo olanan orguyoso lo para'?

¹²"Un dia den bo bida bo a yega di duna ordu na e mainta, i a hasi marduga konose su luga,

¹³pa asina esaki por a tene e finnan di tera wanta, i e malbadonan wordu sakudi for di dje?

¹⁴E ta wordu kambia manera klei bou di seyo, i ta tuma aparensia di un bisti.

¹⁵I lus di e malbadonan ta wordu kita, i e brasa halsa ta wordu kibra.

¹⁶"Bo a yega di penetra te den e fuentenan di laman? Of bo a yega di kana ront den e luganan skondi di profundidat?

¹⁷E portanan di morto a wordu revela na bo? Of bo a mira e portanan di skuridat profundo?

¹⁸Bo a komprende e hanchura di mundu? BisaMi anto, si bo sa tur esaki.

¹⁹"Unda e kaminda pa e habitashon di lus ta keda? I skuridat, unda su luga ta,

²⁰pa bo por hib'e na su teritorio, i pa bo por konose e berehanan pa su kas?

²¹Bo sa, pasobra e tempu ei bo a nase kaba, i e kantidat di bo dianan ta hopi!

²²"Bo a yega di drenta e depositonan di sneu, of bo a mira e depositonan di hagel,

²³ku Mi tin reserva pa e tempu di angustia, pa e dia di guera i bataya?

²⁴Unda e luga ta, kaminda lus ta wordu dividi, of bientu di pariba ta wordu plama riba tera?

²⁵Ta ken a habri un kanal pa e diluvio, of un kaminda pa lamper i strena,

²⁶pa trese awaseru riba un tera kaminda no tin hende, riba un desierto, kaminda no tin hende,

²⁷pa satisfase e tera bandona i desola, i pa hasi simia di yerba spreit?

²⁸Awaseru tin tata? Of ta ken a engendra e gotanan di serena?

²⁹For di ken su matris eis a sali? I eis di shelu, ta ken a parie?

³⁰Awa ta bira duru manera piedra, i superfisio di e abismo a vris.

³¹"Bo por mara e kadenanan di Pleyades, of los e kabuyanan di Orion?

³²Bo por dirigi un konstelashon den su temporada di ana, of guia e Ber ku su streanan?

³³Bo konose e ordenansanan di e shelunan, of bo por stablese nan dominio riba tera?

³⁴"Bo por halsa bo bos na e nubianan, asina ku abundansia di awa por tapabo?

³⁵Bo por manda lampernan, asina ku nan por bai i bisabo: 'Ata nos aki'?

³⁶Ken a pone sabiduria den e spiritu, of ken a duna inteligensia na e mente?

³⁷Ken por konta e nubianan pa medio di sabiduria, of kenter e butishinan di awa di e shelunan,

³⁸ora stof bira un klompi duru, i e klompinan pega na otro?

³⁹"Bo por yag proi pa e leon, of satisfase apetit di e leonnan chikitu,

⁴⁰ora nan ta drumi warda den nan kuebanan, i ta keda spera den nan luga di skonde?

⁴¹Ken ta prepara kuminda pa raf, ora su chikitunan ta grita na Dios, i ta dwal ront sin kuminda?