Read Papantla Totonac Job 41 Bible Online

Job 41 - Papantla Totonac bible

Job 41

¹"Bo por hala leviatan trese ariba ku un anzue? Of primi su lenga abou ku un lina?

²Bo por pasa un kabuya den su nanishi? Of traspasa su kakumbein ku un hak?

³Lo e hasi hopi suplika na bo? Of lo e papia palabranan suave ku bo?

⁴Lo e sera un aliansa ku bo? Lo bo tum'e komo un sirbido pa semper?

⁵Lo bo hunga kune manera ku un parha? Of lo bo mar'e pa bo mucha muhenan?

⁶E kompaneronan lo negosha ofer di dje? Nan lo partie entre e komersiantenan?

⁷Bo por yena su kueru ku harpun, of su kabes ku lansa di piskado?

⁸Pone bo man riba dje; korda e bataya; lo bo no hasie mas!

⁹Mira, bo speransa ta en bano. Lo bo no desmaya djis di wak e so?

¹⁰Ningun hende no tin asina un kurashi ku e ta tribi molesti'e; ken anto ta esun ku por para Mi dilanti?

¹¹Ken a dunaMi, ku Mi mester pagu'e bek? Tur loke tin bou di henter shelu ta di Mi.

¹²"Lo Mi no keda ketu tokante di e miembronan di su kurpa, ni tokante di su forsa poderoso, ni su kurpa bon

¹³Ken por kita su bachi? Ken por penetra su armadura dobel?

¹⁴Ken por habri e portanan di su kara? Ront di su djentenan tin teror.

¹⁵Su skamanan fuerte ta su orguyo, bon sera na otro, manera ta ku seyo nan ta sera na otro.

¹⁶Esun ta asina serka di e otro, ku aire no por pasa meimei di nan.

¹⁷Nan ta pega un na otro; nan ta wanta na otro, i no por wordu separa.

¹⁸Su nisternan ta saka chispa di lus, i su wowonan ta manera e klepnan di wowo di mainta.

¹⁹For di su boka ta sali flambeunan sendi; chispa di kandela ta spat.

²⁰For di su burakunan di nanishi ta sali huma, manera for di un wea ku ta herebe i richi ku ta kima.

²¹Su rosea ta sende karbon, i un flam ta sali for di su boka.

²²Den su nek tin forsa, i sustu ta bula su dilanti.

²³E ploinan di su karni ta sera na otro, firme na su kurpa i inmovibel.

²⁴Su kurason ta duru manera piedra; mes duru ku e piedra parti djabou di mulina.

²⁵Ora ku e lanta su kurpa, e poderosonan ta spanta; pa motibu di e boroto, paniko ta drenta nan.

²⁶E spada ku alkans'e no por hasie nada; ni e lansa, ni e flecha, ni e yabalina.

²⁷E ta konsidera heru komo yerba seku, i brons komo palu putri.

²⁸Flecha no por pon'e hui; piedra di slenger ta bira palu di mainshi seku p'e.

²⁹Klop ta wordu konsidera komo palu di mainshi seku; e ta hari ora ku e yabalina ta zona.

³⁰Bou di su barika tin manera splenter skerpi di wea di klei; e ta laga lastronan marka den lodo.

³¹E ta hasi e profundidatnan herebe manera un wea; e ta hasi laman manera un pochi di unguente.

³²Su tras e ta laga un lastro ku ta lombra; hende lo a kere ku e profundidat tin kabei blanku.

³³Nada riba tera no ta manera e, ku a wordu traha sin miedu.

³⁴E ta wak ku menospresio riba tur loke ta haltu; e ta rei riba tur e yunan di orguyo."