Read Papantla Totonac Job 42 Bible Online

Job 42 - Papantla Totonac bible

Job 42

¹E ora ei Job a kontesta SENOR, i a bisa:

²"Mi sa ku Bo por hasi tur kos, i ku ningun di Bo propositonan no por wordu stroba.

³'Ta ken t'esun ku ta skonde konseho sin konosementu?' Pesei mi a deklara loke mi no tabata komprende, kosnan muchu maraviyoso pa mi, ku mi no tabata konose.

⁴'Skucha awor, i ami lo papia; ami lo hasiBo pregunta i Abo instruimi.'

⁵Ta tende mi a tende di Bo, ma awor mi wowo ta miraBo;

⁶pesei mi ta hala mi palabranan atras, i ta repent! den stof i shinishi."

⁷I a sosode ku despues ku SENOR a kaba di papia e palabranan aki ku Job, SENOR a bisa Elifaz e temanita: "Mi furia a sende kontra bo i kontra bo dos amigunan, pasobra boso no a papia di Mi loke ta rekto, manera Mi sirbido Job a hasi.

⁸Pesei anto, boso kohe shete bishe machu i shete karne chubatu i bai serka Mi sirbido Job, i ofrese pa boso mes un ofrenda kima; i Mi sirbido Job lo hasi orashon pa boso. Pasobra lo Mi asepta su orashon, pa Mi no trata ku boso segun boso lokura, pasobra boso no a papia di Mi loke ta rekto, manera Mi sirbido Job a hasi."

⁹Asina Elifaz e temanita, Bildad e suhita i Zofar e naamatita a bai i a hasi manera SENOR a ordena nan. I SENOR a asepta e orashon di Job.

¹⁰I SENOR a restora e rikesanan di Job ora ku el a hasi orashon pa su amigunan, i SENOR a duna Job dobel di tur loke e tabatin prome.

¹¹E ora ei tur su ruman hombernan i tur su ruman muhenan, i tur ku tabata konos'e antes, a bin serka dje, i nan a kome pan huntu kune den su kas. I nan a konsol'e i a ekspresa nan duele pa tur e maldat ku SENOR a trese riba dje. I kada un a dun'e un plaka di plata, i kada un a dun'e un renchi di oro.

¹²I SENOR a bendishona e ultimo dianan di Job mas ku e promenan. I e tabatin dieskuater mil karne, seis mil kamel, mil yugo di buey i mil buriku yewa.

¹³E tabatin shete yu homber i tres yu muhe.

¹⁴I el a yama esun prome Jemima, e di dos Kesia, i e di tres Keren-hapuk.

¹⁵I den henter e tera no por a hana muhenan asina bunita manera e yu muhenan di Job; i nan tata a duna nan erensia huntu ku nan ruman hombernan.

¹⁶I despues di esaki Job a biba shent'i kuarenta ana, i a mira su yunan i yunan di su yunan, kuater generashon.

¹⁷I Job a muri, un homber bieu i yen di dia.