Read Papantla Totonac Job 5 Bible Online

Job 5 - Papantla Totonac bible

Job 5

¹"Yama awor, tin un hende ku lo kontestabo? I serka kual di e santunan lo bo bai?

²Pasobra rabia ta mata e hende bobo, i envidia ta mata e hende simpel.

³Mi a mira e bobo saka rais, i mi a maldishona su luga di biba mesora.

⁴Su yu hombernan ta leu di siguridat; den e porta nan ta wordu plecha, sin ningun hende pa libra nan.

⁵Esnan ku tin hamber ta kome su kosecha, i asta ta saka esei for di meimei di sumpina, i e hendenan ku set ta anhela na nan rikesa.

⁶Pasobra aflikshon no ta sali for di stof, ni molester no ta spreit for di tera;

⁷pasobra hende a nase pa molester, manera chispa di kandela ta bula bai den laira.

⁸"Ma pa loke t'ami, lo mi a buska Dios, i lo mi a presenta mi kaso dilanti di Dios,

⁹Kende ta hasi kosnan grandi i inskudrinabel, maraviyanan ku no por wordu konta.

¹⁰E ta duna awaseru riba tera, i ta manda awa riba e kunukunan,

¹¹di manera ku E ta halsa e umildenan, i esnan ku ta na rou ta wordu halsa pom den siguridat.

¹²E ta hasi ku komplot di e astutonan ta frakasa, asina ku nan man no por logra eksito.

¹³E ta kaptura e sabinan den nan mes astusia, i ta stroba konseho di e hende bispou.

¹⁴Den dia nan ta kontra ku skuridat, i merdia nan ta kana fula komo si fuera ta nochi.

¹⁵Ma E ta libra esnan den nesesidat for di spada, for di boka di e poderosonan, i for di nan man.

¹⁶Pesei e pober tin speransa i inhustisia mester sera su boka.

¹⁷"Bendishona ta e homber ku Dios ta reprende; pesei no despresia e disiplina di e Todopoderoso.

¹⁸Pasobra E ta kousa dolo i E ta duna alivio; E ta herida i Su man ta kura.

¹⁹E lo librabo den seis difikultat, sf den shete, maldat lo no mishi ku bo.

²⁰Den tempu di hamber E lo redimibo for di morto, i den tempu di guera for di e poder di spada.

²¹Lo bo ta skondi pa sota di lenga, i lo bo no tin miedu di violensia ora ku e bin.

²²Lo bo hari violensia i hamber, i lo bo no tin miedu di bestia feros tampoko.

²³Pasobra lo bo ta liga ku e piedranan di sabana, i e bestianan di sabana lo ta na pas ku bo.

²⁴I lo bo sa ku bo tent ta sigur, pasobra lo bo bishita bo luga di biba i hana ku no ta falta nada.

²⁵Lo bo sa tambe ku bo yunan lo ta hopi, i bo desendientenan manera yerba di tera.

²⁶Yen di vigor lo bo baha den graf, manera ta montona bohi di mainshi na su tempu.

²⁷"Mira, esaki nos a investiga, i asina ta; skucha, i sa pa bo mes."