Read Papantla Totonac Job 6 Bible Online

Job 6 - Papantla Totonac bible

Job 6

¹E ora ei Job a kontesta:

²"Mara mi pena por a wordu pisa, berde, i pom den balansa huntu ku mi kalamidat!

³Pasobra e ora ei e lo tabata mas pisa ku santu di laman; pesei mi palabranan no tabata kontrola.

⁴Pasobra e flechanan di e Todopoderoso ta den mi; mi spiritu ta bebe nan veneno; e terornan di Dios ta para den ordu di bataya kontra mi.

⁵Buriku di mondi sa grita ora e tin yerba, of buey sa grita ora e tin kuminda?

⁶Un kos sin smak por wordu komi sin salu, of tin smak den blanku di webu?

⁷Mi alma ta nenga di mishi ku nan; pa mi nan ta manera kuminda ku ta duna rel.

⁸"Mara mi por a hana mi petishon, i ku Dios lo a dunami loke mi ta anhela na dje!

⁹Mara ku lo a agrada Dios pa kibrami na pida-pida, ku E lo a saka Su man i kortami kit'afo!

¹⁰Ma esaki ta mi konsolashon te awor, i mi ta regosiha den dolo ku no tin alivio, ku mi no a nenga e palabranan di Esun Santu.

¹¹"Ki forsa mi tin, ku mi mester spera ainda? I kual ta mi fin, ku mi mester prolonga mi bida?

¹²Akaso mi forsa ta forsa di piedra? Of ta di brons mi karni ta?

¹³No ta asina ku mi yudansa no ta den mi, i ku sabiduria ta kita for di mi?

¹⁴"Pa e hende ku ta desespera mester tin kompashon di parti di su amigu, pa e no bandona temor di e Todopoderoso.

¹⁵Mi rumannan a aktua ku engano, manera un roi, manera koridanan di roinan ku ta disparse,

¹⁶ku ta trubla pa motibu di eis, i den kualnan sneu ta dirti bai.

¹⁷Den tempu di sekura nan ta stop di kore, ora ta kayente nan ta disparse for di nan luga.

¹⁸E berehanan ku nan ta sigui ta yen di lorada, nan ta kaba na nada i ta perese.

¹⁹E karavananan di Tema tabata buska nan, e biaheronan di Seba tabata spera di mira nan.

²⁰Nan a keda desapunta, pasobra nan tabata konfia; nan a yega ayanan i a keda konfundi.

²¹Di berdat, ta asina boso a para bira awor, boso ta mira un teror i ta hana miedu.

²²Akaso mi a bisa: 'Dunami algu,' of: 'Ofrese plaka pasa bou di mesa pa mi for di boso rikesa,'

²³of: 'Librami for di man di e atversario,' of: 'Redimimi for di man di e opresornan'?

²⁴"Sinami, i lo mi keda ketu; i mustrami kon mi a faya.

²⁵Ki poderoso palabranan onesto ta! Ma kiko bo argumento ta proba?

²⁶Bo tin intenshon di reprende mi palabranan, ora ku palabra di un hende ku ta desespera ta manera bientu?

²⁷Asta pa werfano boso kier tira lot, i koba un buraku pa boso amigu.

²⁸"Awor sea asina bon di wak mi, i mira si mi ta gana den bo kara.

²⁹Pensabo bon awor, no laga tin inhustisia; si, pensabo bon, ainda mi hustisia ta keda para.

³⁰Tin inhustisia riba mi lenga? Mi shel'i boka no por distingui malisia?