Read Papantla Totonac Job 7 Bible Online

Job 7 - Papantla Totonac bible

Job 7

¹"Hende no ta obliga di traha riba tera? I su dianan no ta manera dianan di un trahado kontrata?

²Manera un esklabu ku ta anhela na sombra, of manera un trahado kontrata ku ta spera fervientemente riba su pago,

³asina mi ta poni pa ereda lunanan di banidat, i nochinan trabahoso ta stipula pa mi.

⁴Ora mi bai drumi mi ta puntra: 'Ki ora lo mi lanta?' Ma nochi ta largu, i kontinuamente mi ta bolter te ora dia habri.

⁵Mi kurpa ta tur na bichi i kaska di stof; mi kueru ta habri i ta basha pus.

⁶"Mi dianan ta bai mas lihe ku spul di un wefdo-di-tela, i ta yega na un fin sin speransa.

⁷Korda ku mi bida ta djis un rosea; mi wowo lo no mira mas loke ta bon.

⁸Wowo di esun ku ta mirami lo no mirami mas; bo wowonan lo ta riba mi, ma lo mi no t'ei.

⁹Ora ku un nubia disparse, e no t'ei mas, asina esun ku ta baha den Seol no ta subi bin ariba mas.

¹⁰E no ta bolbe su kas mas, ni su luga di biba lo no konos'e mas.

¹¹"Pesei lo mi no frena mi boka; lo mi papia den e angustia di mi spiritu, lo mi reklama den e amargura di mi alma.

¹²Akaso mi ta laman, of monster di laman, ku Bo ta pone guardia riba mi?

¹³Si mi bisa: 'Mi kama lo konsolami, mi sofa lo alivia mi keho,'

¹⁴e ora ei Bo ta spantami ku sononan i ta terorisami ku vishonnan,

¹⁵di manera ku mi alma lo a prefera sofokashon, i morto na luga di mi dolonan.

¹⁶Mi ta kaba na nada; lo mi no biba pa semper. Lagami na pas, pasobra mi dianan ta djis un rosea.

¹⁷"Kiko hende ta, ku Bo ta engrandes'e, i ku Bo ta preokupa p'e,

¹⁸ku Bo ta samin'e tur mainta, i ta pon'e na prueba tur momento?

¹⁹Lo Bo no kita Bo bista nunka mas for di mi, ni lagami na pas te ora ku mi guli mi skupi?

²⁰Mi a hasi pika? Kiko mi a hasiBo, O wardado di hende? Pakiko Bo a ponemi komo algu pa Bo mek riba dje, asina ku mi ta un karga pa mi mes?

²¹Pakiko anto Bo no ta pordona mi transgreshon i kita mi inikidat? Pasobra awor lo mi drumi den stof, i Abo lo buskami, ma lo mi no t'ei."