Read Papantla Totonac Job 9 Bible Online

Job 9 - Papantla Totonac bible

Job 9

¹E ora ei Job a kontesta:

²"Di berdat, mi sa ku t'asina, ma kon un hende por ta hustu dilanti di Dios?

³Si un hende kier a diskuti kuné, e lo no por a kontest'E un bes den mil biaha.

⁴Sabi di kurason i poderoso den forsa, ken a resisti kontra djé sin sufri dano?

⁵E ta kita e serunan, nan no sa kon, ora ku E bolter nan den Su rabia;

⁶E ta sakudi tera kit'e for di su luga, i su pilarnan ta tembla;

⁷E ta ordena solo i e no ta sali, i ta seya e streanan;

⁸E so ta span e shelunan, i ta kana riba e olanan di laman;

⁹E ta traha Oso, Orion i Pleyades, i e kambernan pasuit;

¹⁰E ta hasi kosnan grandi i insondabel, i obranan maraviyoso ku no por wordu konta.

¹¹Si E pasa banda di mi, mi no ta mir'E; si E pasa forbei, mi no ta ripar'E.

¹²Si E ranka kita algu, ken por strob'E? Ken por puntr'E: 'Ta kiko Bo ta hasi?'

¹³Dios no ta kita Su rabia; e yudadonan di Rahab ta kremp bou di djé.

¹⁴"Kon anto mi por kontest'E, i skohe mi palabranan pa rasona kuné?

¹⁵Pasobra maske mi tabatin rason, lo mi no por a kontesta; lo mi mester a roga pa miserikordia serka mi Hues.

¹⁶Si mi a yama i El a kontestami, lo mi no por a kere ku E tabata skucha mi bos.

¹⁷Pasobra E ta kibrami ku un tempestat, i ta multiplika mi heridanan sin motibu.

¹⁸E no ta lagami kohe rosea, ma ta saturami ku amargura.

¹⁹Si ta un asunto di poder, mira, ta E ta Esun poderoso! I si ta un asunto di hustisia, ken por eksigi di djé pa duna kuenta?

²⁰Maske mi ta hustu, mi boka lo kondenami; maske mi ta sin kulpa, E lo deklarami kulpabel.

²¹"Mi ta sin kulpa; mi no ta hasi kaso di mi mes; mi ta despresia mi bida.

²²Tur ta mesun kos; pesei mi ta bisa: 'E ta destrui tantu esun sin kulpa komo e malbado.'

²³Si zwip mata direpiente, e ta hasi bofon di e desesperashon di e inosente.

²⁴Tera ta keda entrega den man di e malbadonan; E ta tapa kara di su huesnan. Si no t'E, ta ken anto?

²⁵"Awor mi dianan ta pasa mas lihe ku un koredo; nan ta hui bai, nan no ta mira nada bon.

²⁶Nan ta pasa bai manera barku traha di richi, manera un aguila ku ta baha riba su proi.

²⁷Maske mi bisa: 'Lo mi lubida mi keho, lo mi kita mi kara tristu i bisti un sonrisa,'

²⁸tog mi tin miedu di tur mi dolonan, mi sa ku lo Bo no tenemi pa inosente.

²⁹Mi ta wordu konsidera kulpabel; pakiko anto mi mester traha mata kurpa pornada?

³⁰Si mi laba mi mes ku sneu i limpia mi mannan ku soda brabu,

³¹tog lo Bo tirami den pos, i mi mes pananan lo tin fis di mi.

³²"Pasobra E no ta un hende manera ami, ku mi por kontest'E, ku nos por bai huntu dilanti di hues.

³³No tin refri entre nos, ku por pone su man riba nos tur dos.

³⁴Lagu'E kita Su bara for di mi, i no laga miedu p'E terorisami.

³⁵E ora ei lo mi papia sin tin miedu di djé; ma di mi mes mi no ta asina.