Read Papantla Totonac Salmonan 10 Bible Online

Salmonan 10 - Papantla Totonac bible

Salmonan 10

¹Pakiko Bo ta para leu asina, O SENOR? Pakiko Bo ta skonde Bo mes den tempunan di angustia?

²Ku arogansia e malbado ta persigui e pober; laga nan wordu atrapa den e komplotnan ku nan mes a inventa.

³Pasobra e malbado ta gaba di e deseo di su kurason; e ta bendishona e hende golos i ta despresia SENOR.

⁴E malbado, ku su kara yen di orguyo, no ta buska Dios. Tur su pensamentunan ta: "No tin Dios."

⁵Su kamindanan ta prospera tur ora bai; Bo huisionan ta masha haltu, leu for di su bista; tur su atversarionan e ta despresia.

⁶E ta bisa den su mes: "Lo mi no wordu movi, pasobra nunka lo mi no hanami den atversidat."

⁷Su boka ta yen di maldishon, engano i opreshon; bou di su lenga tin perversidat i maldat.

⁸E ta skonde lur den e pueblitonan; den skondi e ta mata e inosente; e ta skonde lur e pober.

⁹E ta lur na skondi manera un leon den su kueba; e ta lur na skondi pa kohe e pober; e ta kohe e pober dor di hal'e den su reda.

¹⁰E ta krak su viktimanan, i nan ta kai abou; nan ta kai den su garanan fuerte.

¹¹E ta bisa den su mes: "Dios a lubida; El a skonde Su kara; E lo no mira esaki nunka."

¹²Lanta, O SENOR; O Dios, lanta Bo man. No lubida esnan ku ta afligi.

¹³Pakiko e malbado ta rechasa Dios? El a bisa den su mes: "Lo Bo no eksigi kuenta di esaki."

¹⁴Bo a mira esaki, pasobra Bo a nota difikultat i tristesa, pa tum'e den Bo man. E pober ta enkomenda su mes na Bo; Abo ta Esun ku ta yuda e werfano.

¹⁵Kibra brasa di e malbado i di e hasido di maldat, rondia su maldatnan te ora Bo no hana ni un mas.

¹⁶SENOR ta Rei pa semper i semper; nashonnan a perese for di Su tera.

¹⁷O SENOR, Bo a tende e deseo di e umildenan; Abo lo fortifika nan kurason, Abo lo inklina Bo orea

¹⁸pa hasi hustisia na e werfano i na esun oprimi, pa hende mortal no kousa teror mas.