Read Papantla Totonac Salmonan 102 Bible Online

Salmonan 102 - Papantla Totonac bible

Salmonan 102

¹Tende mi orashon, O SENOR! I laga mi sklamashon pa yudansa yega serka Bo.

²No skonde Bo kara pa mi den e dia di mi angustia; inklina Bo orea na mi; den e dia ku mi yama, kontestami lihe.

³Pasobra mi dianan ta kaba manera huma, i mi wesunan ta kima manera fogon.

⁴Mi kurason ta dekai i marchita manera yerba, asina ku mi ta lubida di kome mi pan.

⁵Pa motibu di e bos di mi kehamentu mi wesunan ta pega na mi karni.

⁶Mi a bira manera pelikan di desierto; mi a bira manera shoko di luganan bandona.

⁷Mi no por drumi, mi a bira manera parha solitario riba dak di kas.

⁸Henter dia mi enemigunan ta reprochami; esnan ku ta hasi bofon di mi ta uza mi nomber komo maldishon.

⁹Pasobra mi a kome shinishi komo si fuera ta pan, i a meskla mi bibida ku yoramentu,

¹⁰pa motibu di Bo indignashon i Bo furia, komo ku Bo a hisami bentami afo.

¹¹Mi dianan ta manera un sombra di atardi, i mi ta marchita manera yerba.

¹²Ma Abo, O SENOR, ta permanese pa semper; i e rekuerdo di Bo nomber pa tur generashon.

¹³Lo Bo lanta i tene kompashon ku Sion; pasobra ta tempu pa tin miserikordia di dje, pasobra e tempu stipula a yega.

¹⁴Siguramente Bo sirbidonan ta hiba gustu den su piedranan, i tin duele di su stof

¹⁵Asina e nashonnan lo teme e nomber di SENOR, i tur e reinan di tera, Bo gloria.

¹⁶Pasobra SENOR a konstrui Sion; El a aparese den Su gloria.

¹⁷El a konsidera e orashon di esnan desampara i no a despresia nan orashon.

¹⁸Esaki lo wordu skirbi pa e generashon benidero, ku un pueblo ku ainda mester wordu krea por alaba SENOR.

¹⁹Pasobra for di Su haltura santu El a wak abou; for di shelu SENOR a kontempla tera,

²⁰pa skucha kehamentu di e prezo, pa libra esnan ku ta kondena na morto;

²¹pa nan deklara e nomber di SENOR den Sion, i Su alabansa na Jerusalem,

²²ora ku e pueblonan ta reuni, i e reinonan, pa sirbi SENOR.

²³El a debilita mi forsa na kaminda; El a hasi mi dianan mas kortiku.

²⁴Mi ta bisa: "O mi Dios, no hibami na mitar di mi dianan; Bo ananan ta dura di generashon pa generashon.

²⁵For di prinsipio Bo a funda tera; i e shelunan ta e obra di Bo mannan.

²⁶Nan lo perese, ma Abo lo permanese; nan tur lo gasta manera un bistl; manera pana lo Bo kambia nan, i nan lo ta kambia.

²⁷Ma Abo ta keda meskos, i Bo ananan lo no tin fin.

²⁸E yunan di Bo sirbidonan lo biba den siguridat, i nan desendientenan lo biba den Bo presensia."