Read Papantla Totonac Salmonan 103 Bible Online

Salmonan 103 - Papantla Totonac bible

Salmonan 103

¹Bendishona SENOR, O mi alma, i tur loke tin den mi, bendishona Su nomber santu.

²Bendishona SENOR, O mi alma, i no lubida ni un di Su benefisionan;

³Kende ta pordona tur bo inikidatnan; Kende ta kura tur bo malesanan;

⁴Kende ta redimi bo bida for di destrukshon; Kende ta koronabo ku miserikordia i kompashon;

⁵Kende ta satisfase bo deseonan ku kosnan bon, asina ku bo hubentut ta wordu renoba manera aguila.

⁶SENOR ta hasi hustisia i huisio pa tur esnan ku ta wordu oprimi.

⁷El a hasi Su kamindanan konosi na Moises, Su echonan na e yunan di Israel.

⁸SENOR ta yen di kompashon i grasia, Kende no ta rabia lihe, i ta abunda den miserikordia.

⁹E lo no reprende pa semper, ni keda rabia pa semper.

¹⁰E no a trata ku nos segun nos pikanan, ni a paga nos segun nos inikidatnan.

¹¹Pasobra mes haltu ku e shelunan ta for di tera, mes grandi Su miserikordia ta pa esnan ku ta tem'E.

¹²Mes leu ku pariba ta for di pabou, mes leu El a aleha nos transgreshonnan for di nos.

¹³Meskos ku un tata tin kompashon ku su yunan, asina SENOR tin kompashon ku esnan ku ta tem'E.

¹⁴Pasobra E sa di kiko nos ta traha; E ta korda ku ta stof nos ta.

¹⁵Pa loke ta hende, su dianan ta manera yerba; manera flor di sabana, asina e ta florese.

¹⁶Ora bientu pasa riba dje, e no t'ei mas; i su luga no konos'e mas.

¹⁷Ma e miserikordia di SENOR ta di eternidat pa eternidat riba esnan ku ta tem'E, i Su hustisia na e yunan di yunan,

¹⁸na esnan ku ta warda Su aliansa, i ku ta korda Su preseptonan pa kumpli ku nan.

¹⁹SENOR a stablese Su trono den e shelunan; i Su reino ta goberna riba tur kos.

²⁰Bendishona SENOR, boso, Su angelnan, poderoso den fortalesa, ku ta ehekuta Su palabra, obedesiendo e bos di Su palabra!

²¹Bendishona SENOR, boso tur, Su ehersitonan, boso ku ta sirbié i ku ta hasi Su boluntat.

²²Bendishona SENOR, boso tur, Su obranan, na tur parti di Su dominio. Bendishona SENOR, O mi alma!