Read Papantla Totonac Salmonan 104 Bible Online

Salmonan 104 - Papantla Totonac bible

Salmonan 104

¹Bendishona SENOR, O mi alma! O SENOR mi Dios, Bo ta masha grandi; Bo ta bistl ku splendor i mahestat.

²E ta kubri Su mes ku lus manera ku un mantel, E ta span e shelunan manera lona di tent,

³E ta pone e balkinan di Su kambernan-ariba den e awanan, E ta hasi e nubianan Su garoshi, E ta kana riba e halanan di bientu,

⁴E ta hasi e bientunan Su mensaheronan, Su sirbidonan flam di kandela.

⁵El a stablese tera riba su fundeshinan, pa asina esei no kita for di su luga nunka mas.

⁶Bo a tap'e ku profundidat, manera ku un bistl; ariba di e serunan e awanan tabata keda para.

⁷Debi na Bo reprendementu nan a hui; na e zonidu di Bo strena nan a pura bai.

⁸Nan a subi pasa riba e serunan i a baha den e vayenan, na e luga ku Bo a stablese pa nan.

⁹Bo a pone un frontera ku nan no por pasa, pa nunka mas nan no bolbe kubri tera.

¹⁰E ta manda fuentenan den e vayenan; nan ta kore meimei di e serunan.

¹¹Nan ta duna di bebe na tur bestia di sabana; e burikunan di mondi ta kita nan set.

¹²Banda di nan e parhanan di shelu tin nan neishi; nan ta kanta den e ramanan.

¹³E ta muha e serunan for di Su kambernan-ariba; tera ta keda satisfecho ku e fruta di Su obranan.

¹⁴E ta hasi yerba krese pa bestia, i vegetashon pa hende kultiva, pa asina e por saka pan for di e tera,

¹⁵i bina ku ta hasi kurason di hende kontentu, zeta pa hasi su kara lombra, i pan ku ta fortalese kurason di hende.

¹⁶E palunan di SENOR ta hana sufisiente awa, e palunan di seda di Libano, ku El a planta.

¹⁷Ayanan e parhanan ta traha nan neishi, i e oyevar tin su kas den e palu di pino.

¹⁸E serunan haltu ta pa kabritu di mondi; e barankanan, un refugio pa konenchi.

¹⁹El a pone luna pa e temporadanan di ana; solo sa ki ora e mester baha.

²⁰Bo ta pone skuridat, i ta bira nochi; e ora ei tur bestia di mondi ta kuminsa move.

²¹E leonnan chikitu ta gruna tras di nan proi, i ta buska nan kuminda for di Dios.

²²Ora solo sali nan ta retira, i ta kai drumi den nan kueba.

²³Hende ta sali bai su trabou i ta traha te anochi.

²⁴O SENOR, ki numeroso Bo obranan ta! Ku sabiduria Bo a traha tur; tera ta yen di loke Bo a krea.

²⁵Ata e laman, grandi i hanchu, kaminda tin kantidat di bestia ku no por wordu konta ta kriul den otro, bestia chikitu i grandi.

²⁶Aya barkunan ta pasa; i Leviatan, ku Bo a forma, ta hunga den dje.

²⁷Esakinan tur ta spera riba Bo, pa Bo duna nan kuminda na su debido tempu.

²⁸Bo ta duna nan, nan ta rekohe esaki; Bo ta habri Bo man, nan ta keda satisfecho ku kosnan bon.

²⁹Bo ta skonde Bo kara, nan ta desmaya; Bo ta kita nan rosea, nan ta muri i ta bolbe bira stof.

³⁰Bo ta manda Bo Spiritu, nan ta wordu krea; Bo ta renoba e superfisio di tera.

³¹Laga e gloria di SENOR dura pa semper; laga SENOR regosiha den Su obranan.

³²E ta wak e tera, i esaki ta tembla; E ta mishi ku e serunan, i nan ta saka huma.

³³Lo mi kanta na SENOR tanten ku mi ta biba; lo mi kanta alabansa na mi Dios mientras ku mi tin bida.

³⁴Laga mi meditashon ta agradabel p'E; pa loke t'ami, lo mi alegra mi mes den SENOR.

³⁵Laga pekadonan perese for di riba tera, i no laga malbadonan eksisti mas. Bendishona SENOR, O mi alma. Alaba SENOR!