Read Papantla Totonac Salmonan 105 Bible Online

Salmonan 105 - Papantla Totonac bible

Salmonan 105

¹Duna gradisimentu na SENOR, invoka Su nomber; hasi Su echonan konosi den e pueblonan.

²Kanta na djé, kanta alabansa na djé; papia di tur Su maraviyanan.

³Gloria den Su nomber santu; laga e kurason di esnan ku ta buska SENOR ta kontentu.

⁴Buska SENOR i Su fortalesa; buska Su kara kontinuamente.

⁵Korda Su echonan maraviyoso ku El a hasi, Su milagernan i e huisionan di Su boka,

⁶O simia di Abraham, Su sirbido, O yunan di Jakob, Su skohinan!

⁷E ta SENOR nos Dios; Su huisionan ta den henter mundu.

⁸El a korda Su aliansa pa semper, e palabra ku El a ordena na mil generashon,

⁹e aliansa ku El a sera ku Abraham, i Su huramentu na Isaak.

¹⁰Anto El a konfirma esaki na Jakob komo un statuto, na Israel komo un aliansa eterno,

¹¹bisando: "Na bo lo Mi duna tera di Kanaan komo e porshon di bo erensia."

¹²Tempu ku nan tabata poko hende ainda, masha poko mes, i stranhero den dje.

¹³I nan a kana dwal di un nashon pa otro, di un reino pa un otro pueblo.

¹⁴E no a permit! ningun hende oprimi nan; El a reprende reinan pa nan motibu,

¹⁵bisando: "No mishi ku Mi unginan, ni hasi malu na Mi profetanan."

¹⁶I El a manda un hamber riba tera; El a kibra henter e provishon di pan.

¹⁷El a manda un homber nan dilanti, Jose, kende a wordu bendi komo esklabu.

¹⁸Nan a lastima su pianan ku bui, i su nek nan a sera den heru,

¹⁹te ora ku su palabra a wordu kumpli, te ora ku e palabra di SENOR a proba ku e tabatin rason.

²⁰E rei a duna ordu pa los e, e gobernante di e pueblonan a pon'e den libertat.

²¹El a hasie senor di su kas, i gobernante riba tur su propiedatnan,

²²pa enkarsela su prensnan ki ora ku e tabata kier, pa e por a sina su ansianonan sabiduria.

²³Israel tambe a bin Egipto; i Jakob a keda biba komo stranhero na tera di Kam.

²⁴I El a hasi Su pueblo multiplika masha hopi mes, i a hasi nan mas fuerte ku nan atversarionan.

²⁵El a kambia nan kurason pa nan odia Su pueblo, pa trata Su sirbidonan ku astusia.

²⁶El a manda Su sirbido Moises, i Aaron, kende El a skohe.

²⁷Nan a hasi Su senalnan meimei di nan, i Su milagernan na tera di Kam.

²⁸El a manda skuridat i a hasi e tera bira skur, i nan no a rebeldia kontra Su palabranan.

²⁹El a hasi nan awanan bira sanger, i a hasi ku nan piskanan a muri.

³⁰Nan tera a keda pesta di dori, asta den e kambernan di nan reinan.

³¹El a papia, i a bin un nubia di muska i wimpiri den henter nan teritorio.

³²El a duna nan hagel pa yobida, flam di kandela den nan tera.

³³Tambe El a destrui nan matanan di wendruif i nan palunan di figo, i a kibra e palunan di nan teritorio na pida-pida.

³⁴El a papia, i tirakochi a bin, i bichi di tirakochi na kantidat,

³⁵ku a kome tur vegetashon di nan tera, i ku a kome tur fruta di nan kunuku.

³⁶Tambe El a mata tur primogenito den nan tera, e prome fruta di tur nan vigor.

³⁷E ora ei El a saka nan afo, karga ku plata i oro; i den nan tribunan no tabatin ningun hende ku a trompeka.

³⁸Egipto a keda kontentu ora nan a bai, pasobra temor pa nan a drenta nan.

³⁹El a habri un nubia pa tapa nan, i kandela pa lusa anochi.

⁴⁰Nan a pidi, i El a trese patrishi, i a satisfase nan ku e pan di shelu.

⁴¹El a habri e baranka, i awa a basha for di dje; esei a kore manera riu den e luganan seku.

⁴²Pasobra El a korda Su palabra santu na Su sirbido Abraham;

⁴³i El a saka Su pueblo ku goso, Su skohinan ku un gritu di alegria.

⁴⁴Tambe El a duna nan e teranan di e nashonnan, pa nan kohe pa nan mes e fruta di trabou di e pueblonan,

⁴⁵asina ku nan por a warda Su statutonan i kumpli ku Su leinan. Alaba SENOR!