Read Papantla Totonac Salmonan 109 Bible Online

Salmonan 109 - Papantla Totonac bible

Salmonan 109

¹O DIOS di mi alabansa, no keda ketu!

²Pasobra nan a habri boka di maldat i engano kontra mi; nan a papia kontra mi ku lenga mentiroso.

³Tambe nan a rondonami ku palabranan di odio, i a bringa kontra mi sin motibu.

⁴Komo pago pa mi amor nan ta aktua komo mi akusadonan; ma ami ta hasi orashon.

⁵Asina nan a pagami malu pa bon, i odio pa mi amor.

⁶Nombra un hende malbado pa ta riba dje, i laga un akusado para na su man drechi.

⁷Ora ku e wordu huzga, lagu'e sali kulpabel, i laga su orashon bira pika.

⁸Laga su dianan ta poko; laga un otro tuma su puesto.

⁹Laga su yunan keda sin tata, i su esposa keda biuda.

¹⁰Laga su yunan dwal ront i pidi limosna, i laga nan buska pan leu for di nan kasnan ruina.

¹¹Laga fiado di plaka gara tur loke e tin, i laga stranheronan plunder e fruta di su labor.

¹²No laga tin ningun hende pa tene miserikordia di dje, ni ningun hende pa tene kompashon ku su yunan ku a keda sin tata.

¹³Laga su desendientenan wordu korta kita afo, laga nan nomber wordu kita den e proksimo generashon.

¹⁴Laga e inikidat di su tatanan keda rekorda dilanti di SENOR, i no laga e pika di su mama wordu kita.

¹⁵Laga nan ta kontinuamente dilanti di SENOR, pa E korta kita rekuerdo di nan for di riba tera.

¹⁶Pasobra e no a korda di tene miserikordia, ma a persigui e hende afligi i den nesesidat, i esun di kurason kibra, pa mata nan.

¹⁷Tambe e tabata gusta maldishon, i esei a bin riba dje; i e no tabata hiba gustu den bendishon, asina esei a keda leu for di dje.

¹⁸Ma el a bisti maldishon komo si fuera ta su pana di bisti, i esei a drenta su kurpa manera awa, i manera zeta el a drenta su wesunan.

¹⁹Laga esei sirbi p'e komo un pana ku e ta tapa su kurpa kune, i komo un faha ku konstantemente e ta faha su mes kune.

²⁰Laga esaki ta e rekompensa di SENOR pa mi akusadonan, i pa esnan ku ta papia malu kontra mi alma.

²¹Ma Abo, O DIOS, e Senor, trata ku mi pa kousa di Bo nomber; librami, pasobra Bo miserikordia ta bon;

²²pasobra mi ta afligi i den nesesidat, i mi kurason ta herida den mi.

²³Mi ta pasa bai manera un sombra di atardi; mi ta wordu sakudi kita for di kurpa manera tirakochi.

²⁴Mi rudianan ta debil pa motibu di yunamentu, i mi kurpa a bira flaku, sin vet.

²⁵Tambe mi a bira un reproche pa nan; ora nan mirami, nan ta sakudi kabes.

²⁶Yudami, O SENOR mi Dios; salbami segun Bo miserikordia.

²⁷Laga nan sa ku esaki ta Bo man; Abo, SENOR, a hasi esaki.

²⁸Laga nan maldishona, ma Abo bendishona; ora nan lanta, nan lo keda brongosa, ma Bo sirbido lo ta kontentu.

²⁹Laga mi akusadonan wordu bisti ku desonor, i laga nan tapa nan mes ku nan mes berguensa manera ku un mantel.

³⁰Ku mi boka lo mi duna masha hopi gradisimentu na SENOR, i meimei di e multitut lo mi alab'E.

³¹Pasobra E ta para na man drechi di esun den nesesidat, pa salb'e for di esnan ku ta huzga su alma.