Read Papantla Totonac Salmonan 118 Bible Online

Salmonan 118 - Papantla Totonac bible

Salmonan 118

¹Duna gradisimentu na SENOR, pasobra E ta bon; pasobra Su miserikordia ta pa semper.

²Laga Israel bisa: "Su miserikordia ta pa semper."

³Laga e kas di Aaron bisa: "Su miserikordia ta pa semper."

⁴Laga esnan ku ta teme SENOR bisa: "Su miserikordia ta pa semper."

⁵For di mi aflikshon mi a sklama na SENOR; SENOR a kontestami i a ponemi den un luga espasioso.

⁶SENOR ta ku mi; lo mi no tin miedu; kiko hende por hasimi?

⁷SENOR ta ku mi entre mi yudadonan; pesei lo mi mira ku satisfakshon riba esnan ku ta odiami.

⁸Ta miho pa tuma refugio den SENOR ku konfia den hende.

⁹Ta miho pa tuma refugio den SENOR ku konfia den prensnan.

¹⁰Tur nashon tabata rondonami; den e nomber di SENOR lo mi destrui nan sigur.

¹¹Nan tabata rondonami, si, nan tabatin mi tur rondona; den e nomber di SENOR lo mi destrui nan sigur.

¹²Nan a rondonami manera abeha; nan a wordu paga manera un kandela di sumpina; den e nomber di SENOR lo mi destrui nan sigur.

¹³Ku violensia bo a pushami te ku mi a kai, ma SENOR a yudami.

¹⁴SENOR ta mi fortalesa i mi kantika, i El a bira mi salbashon.

¹⁵E zonidu di gritunan di alegria i di salbashon ta den e tentnan di e hustunan; e man drechi di SENOR ta hasi kosnan grandi.

¹⁶E man drechi di SENOR ta halsa; e man drechi di SENOR ta hasi kosnan grandi.

¹⁷Lo mi no muri, ma lo mi biba, i konta di e obranan di SENOR.

¹⁸SENOR a disiplinami severamente, ma E no a entregami na morto.

¹⁹Habri e portanan di hustisia pa mi; lo mi drenta dor di nan, lo mi duna gradisimentu na SENOR.

²⁰Esaki ta e porta di SENOR; e hustunan lo drenta dor di dje.

²¹Lo mi dunaBo gradisimentu, pasobra Bo a kontestami, i Bo a bira mi salbashon.

²²E piedra ku e trahadonan a rechasa a bira e piedra-di-skina prinsipal.

²³Esaki ta loke SENOR a hasi; i e ta maraviyoso den nos bista.

²⁴Esaki ta e dia ku SENOR a traha; laga nos regosiha i ta kontentu den dje.

²⁵O SENOR, salba awor, nos ta rogabo; O SENOR, nos ta rogaBo, manda prosperidat!

²⁶Bendishona ta esun ku ta bin den e nomber di SENOR; nos a bendishona boso for di e kas di SENOR.

²⁷SENOR ta Dios, i El a hasi Su lus briya riba nos; mara e sakrifisio ku kabuya na e kachunan di e altar.

²⁸Bo ta mi Dios, i mi ta dunaBo gradisimentu; mi Dios, mi ta halsaBo.

²⁹Duna gradisimentu na SENOR, pasobra E ta bon, pasobra Su miserikordia ta pa semper.